ТIекхочийла долу линкаш

ЦIеххьана кхаьчна хаам!

Нурмагомедов гIур вац "Цхьаьнатоьхначу Штаташа а, Гуьржийчоьно а санкцеш тоьхначу" Абхазе


UFC-н ийиначу кепехь латтаран чемпион волу Нурмагомедов Хьабиб ваха лерина вац Дуьненаюкъарчу бераш Iалашдаран дийнахь, Мангал-беттан 1-чохь, Абхазе. Спортхочун менеджерна Магомедов Ризванна тIе а тевжаш, иштта хаам бина ша-шех пачхьалкх олучу республикан пачхьалкхан кхеташоно Стигалкъекъа-беттан 29-чохь.

Визит юхаяьккхина "Американ Цхьаьнатоьхначу Штатийн а, Гуьржийн а агIор Америко шена елла виза дIаяккхарх а, UFC-ца лела юкъарло а, Америкаца долу контракташ а дохарх болчу кхерамца доьзна", аьлла Магомедовс, боху "Эхо Кавказа" проекто.

Абхазин агIоно бахарехь, хьалхо Нурмагомедовс ша телефонан къамелехула дош деллера Абхазин президентна Бжания Асланна хьошалгIа ван.

"Нурмагомедов Хьабиба баркалла боху халкъанна, цуьнан къоначу спортхошна шех доглазарна а, шегахьа хиларна а, амма хIоьттинчу хьолаца доьзна хоуьйту шен вогIийла цахилар", - хаам бина Абхазин Iедалхоша.

Пачхьалкхан спортан урхалло хаам баржийна, Хьабибан ден Нурмагомедов Iабдул-Манапан цIарах йолчу латархойн школо тIеоьцур бу Абхазера спортхой, кечбийр бу уьш Оьрсийчуьрчу а, дуьненаюкъарчу а къовсамашкахь дакъалаца, аьлла. Оцу школе хьовсо республикан кегийрхойн а, спортан а комитето спортхой хоржур бу карабогIучу шина баттахь.

  • 2021 шеран Зазадоккху-баттахь Нурмагомедов Хьабиб цо карьера ерзорца доьзна ваьккхира UFC-н массо а рейтингашкара. Ша спорт юьтуш хилар дIахьедира цо америкахо Гэтжи Джастин ша эшийначу дийнахь – стохка ГIадужу-беттан 24-чохь.
  • Цхьанакхеттачу къаьмнийн организаци юкъайогIучу дукхахйолчу пачхьалкхаша Гуьржийчоьнан дакъа лору Абхази. Оьрсийчоьно къобалйина цуьнан пачхьалкхалла 2008 шарахь. Абхазино барт хIоттийна Оьрсийчоьнца цуьнан эскарш шен территори тIехь латто.

Текстехь нисъяла тарло ша-шех пачхьалкх лоручу Абхазехь лела терминологи а, топонимаш а.

Коьрта теманаш

Оха хьоьхург

XS
SM
MD
LG