Подмосковьерчу Котельникехь маьждигехь полицин белхахоша лецна пIераскан дийнахь рузбане гулбелла бусалбанаш. Цунах лаьцна хаам бина ОВД-инфо зорбан гIирсо.
Маьждигехь яьккхина видео шен агIонехь дIахIоттийна Baza телеграм-канало. Цу тIехь гуш ду маьждиге баьхкинчу нехан кехаташ хоьттуш полисхой хилар.
Хилларг гинчара дийцарехь, полицин ницкъаша дуккха а адам сацийнера маьждигера ара ца долуьйтуш, эххаре 60 гергга стаг дIавигира "Люберецкое" полицин декъе.
ТIаьхо "Гражданское содействие" бакъонашларъяран тобанца (арахьара агент лаьрра ю Оьрсийчохь) болх бечу адвоката Красова Марияс ТАСС агенталле бинчу хаамца, лецнарш, протоколаш а ца хIиттош, дIахецна.
"Цхьана низамашлардон органийн белхахочо ма аллара, адамаш дIалецар дакъа дара талламан цхьана мероприятийн, оцу гурашкахь лецначеран схьаийцира ДНК", - боху Красовас.
Цо дийцарехь, нах дIалоьцуш маьждигехь хилла 600 гергга стаг. "Цу чохь хилла Оьрсийчоьнан махкахой, дIахийцира паспорташка а хьажна. Кхечу пачхьалкхара нах (полицин) декъе а бигна, дIахийцира ДНК гулйинчул тIаьхьа", - аьлла адвоката.