Оьрсийчоьнан талламан комитет реза ца хилла Иркутскан областехь Ангарскерчу ИК-15 колонехь хан токхуш волчу Нохчийчуьрчу вахархочо Хайдаев Хьумайда, шена тIехь Iазап дина аьлла бина латкъам бахьана долуш бехктакхаман гIуллакх доло. Тутмакх хьийзийна хилла 2020-чу шарахь Охан-баттахь чубоьхкинчу наха оцу колонехь айина бунт охьатаIийначул тIаьхьа.
Цул тIаьхьа Хайдаев дехьаваьккхина хилла Иркутскерчу номер цхьаъ йолчу (СИЗО-1) талламан изоляторе. Цо дийцарехь, цига дIакхаьчначул тIаьхьа, цига бигина тутмакхаш чекхбаьхна хилла шина агIор дIахIиттинчу колонерчу белхахоша буйнаш а, мийраш а, ризянкин чхьонкарш а етташ.
Цул тIаьхьа Хайдаев чувоьллина "жигархой" – администрацица юкъаметтигаш лело тутмакхаш - чохь болчу камерина. Цара йиттина цунна маьнгешна юкъахь когаш а, куьйгаш а дихкина ирх а оьллина. Цул сов цара дегIах Iитина цунна цIартIехь цIе бина Iаьг. Хайдаевс чIагIжарехь, "жигархоша" ницкъ бина цунна СИЗО-н администрацин омрица. Лоьраша кехаташ хIиттийна цуьнан коган пIелгаш а, куьйган даьIкаш а кегйина хиларх а, дегI Iарждина хиларх а, дегIан меженаш дIайиттина ларш хиларх а.
Шена ницкъ бар хьокъехь кхушара Стигалкъекъа-баттахь Хайдаев Хьумайда латкъам бинера прокуратуре, цо яздина кехат дIахьажийра Талламан комитете, таллам цу хьокъехь ца бинера. Иза болийра ГIадужу-баттахь, талламхой хIумма а ца деш Iаш хиларна Хайдаевс бина латкъам кхело нийса лаьррачул тIаьхьа.
Цуьнца цхьаьна Хайдаев Хьумайд ву Ангарскерчу ИК-15 колонехь бунт айарна долийначу бехктакхаман гIуллакхехула коьрта бехке бечех цхьаъ. "Комитет против пыток" бакъонашларъярхойн тобан юриста Смирнов Владимира дийцарехь, билггал цуьнца доьзна ду ницкъ бар цаталлар: "Кхин болу эшам хилларш цу кеппарчу хьелашкахь зулам лайнарш хуьлуш Iедал ду. Хайдаев Хьумайд "персона нон-грата" ву... Талламхой кхоьруш бу, нагахь ницкъ бина хилар тIечIагIдан аьтто балахь, иза жоьпе озо хала хир ду бохучух".
- Хайдаев Хьумайд маьршавала везаш вара 2020-чу шарахь Дечкен-баттахь, вуьшта аьлча бунт айъале 3 бутт хьалха, амма колонин администрацино латтош вара иза колонехь.
- Иркутскерчу СИЗО-1 талламан изоляторехь латтийна волчу Нохчийчуьрчу вахархочо Беличков Муслима дийцира Кавказ.Реалиига цигахь кхоьллинчу ницкъ баран конвейерх лаьцна а, оцу хьелашкахь уггар боккха бала ловш берш бусалба нах хиларх лаьцна а.
