Оьрсийчоьнан пачхьалкхан думан Нохчийчуьрчу депутата Саралиев Шамсаила хьехна экстремизна а, терроризмана бехкебина, федералан лехамашка беллачу нахана оьрсийн хаамийн гIирсашкахь къамелаш дарна доза тохар. Нагахь санна парламенто и низам тIеэцахь, режимна критика ечу оппозицин жигархойн а, политикийн а таро хир яц зорбанан гIирсашна тIекхача.
"Федералан а, дуьненаюкъара а лехамашкахь болчу нехан къамелаш Оьрсийчохь сацаде аьлла, кхайкхам бо аса. Вуьшта аьлча, Зуламан кодексан муьлххачу артиклана тIехула зенаш а дина, махкара бовда а боьвдда, радиохь а, телехьожийлашкахь а авторийн передачаш йиллина ала мегар долуш, зорбане буьйлу уьш", - аьлла Саралиевс Daily Storm агенталле.
Депутата билгалдаьккхина, и дехкар къамелаш дечийн политикан позицих доьзна хилар, уьш, цо ша ма-аллара, Оьрсийчоьнан Iедалшна "тIелеташ", Американ цхьанатоьхначу штаташка а, Евросоюзе а санкцеш яхаре кхойкхуш хьийза. Прессана а, интернетера гIирсашна а хьеха тарло иштта нах зорбане бохуш "федералан а, дуьненаюкъара а лехамашкахь волу стаг", аьлла билгалонаш хIиттон – "арахьара агенташ" леринчу терроран вовшахтохаршна а, НКО-шна а хIитточарех тера.
Низаман проект кховдор доьзна хила тарло, шеца цхьаьна, вежарш Янгулбаев Абубакар а, ИбрахIим а зорбанийн гIирсашка бийларца (тIаьххьарниг ву федералан лехаме велла). Нохчийн Iедалхоша уьш бехкебо оппозицин 1ADAT телеграм-каналаца боьзна хиларна. Саралиевс кховдийна проект бахьана долуш зен хила тарло Оьрсийчуьра дIабахначу оппозицин политикан Навальный Алексейн агIончашна а.
"Ур-аттала чубоьхкинчу нехан дешан маршо а яц режиман дозанашца бен йихкина, таллам бечу юкъанна чохь латтон нах ца бийцича а. Дешан маршонна доза детта йиш яц оцу бух тIе а тоьвжина – иза ца догIу Конституцица", - комментари йина Кавказ.Реалиига хаамийн а, аналитикан а "Сова" (Оьрсийчохь арахьара агент лерина ю, амма центр оцу сацамна реза яц – ред.) центран хьалханчас Верховский Александра нохчийн депутата динчу дIахьедарна.
- Нохчийчоьнан куьйгалхочо а, цуьнан гонара наха а Чиллан-беттан 4-хь дуьйна гуш-хезаш нохчийн бакъоларъярхочун Янгулбаев Абубакаран фамили ца йоккху, цуьнан нана нуьцкъаха Нижний Новгородера ядийна Нохчийчу дIайигира, тIаьхьо полисхочунна тIелетта, аьлла бехке а йина цунна арест йира. Кадыровс а, цуьнан гонара наха ЯнгулбаевгIарна биллина кхерамаш тийсира, ткъа Соьлжа-ГIалахь царна дуьхьал митинг хIоттийра, хаамийн гIирсаша бахарехь, цига схьагулбинера бюджетан белхалой. Кремл реза ца хилира оцу гIуллакхна юкъа гIорта, амма регионан куьйгалхо Оьрчийчоьнан президентаца Чиллан-беттан 3-хь цхьанакхеттачул тIаьхьа Кадыров Рамзан а, цуьнан гонера нах а ца хIутту ЯнгулбаевгIеран цIераш яха.
- Чиллан-беттан 7-хь оьрсийн оппозицин политика Яшин Ильяс онлайн-петици хIоттийра президентана Путин Владимирна Кадыров Рамзан шен даржах вохор тIе а дожош. Цхьана дийнахь петицина бух вазвелла I00 эзар сов Change.org платформан пайдаэцархой. Кремлехь дIахьедира, шайна иза дош ца хета, аьлла. Хьалххо журналисташна а, бакъоларъярхошна а нохчийн Iедалхоша тийсина кхерамаш талла аьлла тIедожийра “Новая газетас”, журналистийн а, хаамийн гIирсийн белхалойн а Профсоюза а. Церан кхайкхамаш жоп доцуш диссира.
