Наггахь бен ца хуьлу дийнаташ а, ораматаш а кхиош, даржош йолу "Эрзи" комплексан цхьа дакъа къоман парк ян Нохчийчоьне дIалуш, пакет кехаташна куьйгаш яздина ГIалгIайчоьнан Iедалхоша. Нохчийчоьнан куьйгалхочуьнца хиллачу цхьанакхетарехь цунах лаьцна дIахьедина Оьрсийчуьрчу Iаламан хазнийн а, экологин а министро Козлов Александра, яздо Кавказ.Реалиино.
Министро бахарехь, 2023-чу шеран Стигалкъекъа-беттан 1-ра де тIекхачале латтанаш дIадаларх президентан омра министрийн кабинете листа чукхачон дезаш дара.
"И хаттар гуттаренна а дерзон дезаш дара. Оха бартбина белхан комиссехь, хIора регионан куьйгалхочо къастор ду, хьан куьйгяздийр ду дан дезачун (Iилма а юкъадало деза), мехкийн урхалхошца дийцарш дерза дезаш ду Товбеца-беттан 15-чу дийне кхаччалц. ГIалгIайчохь хIинцале а дахначу кIиранах и кхочушдина даьлла, шун куьйгашка хьоьжуш ду тхо. Теманаш чIогIа ира а, лазаме а ю, амма белхаш дIаболо документаш кечдина дацара", - далийна Козловн дешнаш ЧГТРК «Грозный» телеканало.
Министро тIетоьхна, ГIалгIайчоьнан дозанаш дIадаларх хаттар айдинера Нохчийчоьнан куьйгалло президентан Путин Владаимиран а, премьер-министран Мишустин Михаилан а цIарах кхехьийтина кехаташ бахьана долуш.
«Даймохк» парк кхолла дагахь хиларх 2020-чу шеран юьххьехь дIахьедира Нохчийчоьнан премьер-министро Хучиев Муслима. Официалехь дIахьедарца, "парко таро лур ю дийнатийн а, ораматийн бен-берсалла Iалашъян, цо хьелаш хIиттор ду туризмана а, садаIарна а". Оцу проектана юкъа мел ахча дилла деза, цкъачунна хууш дац.
- Карладоккху, республикашна юкъара доза Нохчийчоьнехьа хуьйцуш хиларх къаьстира ГIалгIайчоьнан бахархошна 2018-чу шарахь, нохчийн некъан белхахоша, ницкъахой улло а хIиттийна, «Эрзи» олучу комплексехь белхаш болийча, 15 километарна ГIалгIайчу а боьлхуш. Махкахь нах протесте бевлира – эххар а митинган декъашхошна хенаш йиттира ворхI шарера исс шаре кхаччалц, ткъа ГIалгIайчоьнан куьйгалхочо а, Кадыров Рамзана а оцу юкъанна куьйгаш яздира регионашна юкъара дозанаш тIечIагIдеш.
- Iедалхоша цхьаьнамаьӀнехь ду аьлла, латтанаш дIасахийцира республикаша, амма картографаша дIахьедира, ма-дарра аьлча, Нохчийчоьно долаяьккхина меттиг 25-зза сов хиларх, Нохчийчоьно схьаеллачул а.
