Ессентикехь кхело бехке лаьрра ГIалгIайчуьрчу дуьхьалонан акцешна хьалхабевлла лелла жигархой ницкъаллин структурийн белхахошна ницкъбар вовшахтохарна а, эскстремистийн юкъарло кхолларна а, ткъа иштта цунна юкъахь дакъалацарна а. Хенаш тоьхна царна 7-9 шераш набахтехь даккха.
Ужахов Малсагна, Барахоев Ахмедна, Мальсагов Мусана хIоранна 9 шо тоьхна, Барахна, Хаутиев Багаудинна, Нальгиев Исмаилна хIоранна а 8 шо тоьхна, Саутиева Зарифина 7 шо 6 бутт тоьхна колонехь даккха. И хенаш тохар даьхнера бехкебечарна прокуроро а.
Кхелехь дакъалоцуш хиллачу адвоката Куриев Мохьмада хаам бина Кавказ.Реалиига, Ужахов кхин а бехке вина хиларх лаьцна "бахархоша шайн гражданийн декхарш кхочуш ца дарна тIехьоьхучу коммерцица йоьзна йоцчу вошвхтохараллана куьйгалла дар я кхидолу низамашца догIуш доцург лелор" артиклехула.
Барахоев бехке вина оцу вовшахтохараллехь дакъалацарана а, шолгIа гражданство а йоьлуш, цунах лаьцна Iедалшка ца хаийтарна а.
- Зазадоккху-беттан 26-чохь Магасехь митинг дIаяьхьира Нохчийчоьнан а, ГIалгIайчоьнан а доза билгалдоккхуш барт барна дуьхьал. ШолгIачу дийне яьллачу цу акцехь тасадаларш хилира гулбеллачийн а, полисхойн а.
- Нохчийчоьнан а, ГIалгIайчоьнан а дозанех бертана куьйгаш яздира 2018-чу шеран Гезгмашин-беттан 26-чу дийнахь, хIетахь гIалгIайн куьйгалхо хиллачу Евкуров Юнус-Бека а, Нохчийчоьнан урхалхочо Кадыров Рамзана а. ТIаьхьо Оьрсийчоьнан Конституцин кхело а тIечIагIдира сацам бакъонца бу аьлла. Оцу тIехула митингийн тулгIе гIаттийра ГIалгIайчохь: акцеш дIаяьхьира 2018-чу шеран гурахь а, 2019-чу шеран бIаьста а. Дозанаш къастор нийсонца дацара, протестхошна хетарехь.
- Бакъонашларъяран "Мемориал" (Оьрсийчоьнан Iедалхоша арахьарчу агентийн могIаре язйина, организаци цунна реза ца хилла. - Редакцин билгалдаккхар.) центро политикан тутмакхаш лаьрра гIалгIайн протестан хьалханчаш.
