Нохчийчоьнан куьйгалхочун ГIезалойчуьра "векало" Бердукаев Асламбека юкъараллин кепехь дIакхоьхьур ду шегара дарж, мехкан къоман политикан а, арахьарчу зIенийн а, зорбанан а, информацин а минисраллин белхахо санна гIуран-беттан 30-чуьра дуьйна. Оцу хьокъехь омрана куьгйаздина Нохчийчоьнан урхалхочо Кадыов Рамзана. Иштта Бердукаевх пачхьалкхан белхахо хилла, бьюдетера алапа оьцур ду цо.
Тоххара Волгоградан кIоштахь юьртбахаман гIуллакхан коьртехь вара иза, 2010-чу шарахь бохийра цуьнан болх.
Федерацин хIора субъектан Москвахь хила йеза векалалла йоцург а, Нохчийчоьнан векалташ ю Рязанан кIоштахь а, Санкт-Петербргехь а, Краснодар-махкахь а, Къилбаседа Малхбузенан федералан гонашкахь а, Туркойчохь а. 2017-чу шарахь официалан "Чечня Сегодня" ресурсо чIагIдора, Оьрсийчоьнан йоллу регионашкахь Нохчийчоьнан векалаллаш ю бохуш.
- ГIуран-баттахь Оьрсийчоьно оккупаци йинчу Херсонан а, Запорожьен а кIошташкахь шен "векал" хIоттийра Кадыров Рамзана "Ахмат" СОБР-н командиран гIовс Ибрагимов Хьасан. 2020-чу шарахь эскархочо мехкан куьйгалхочун карара Нохчийчоьнан лаккхара совгIат схьаийцира – Кадыров Ахьмадан орден. ТIаьхьа дийцадаьккхира, аннексий инчу ГIирмехь иза летарх.
- Хьалхо Кадыровс иштта хаамбира, "ДНР" аьлла, шаьш дIакхайкхийначу республикехь шен "векал" хIотторах – иза ву цул хьалха вевзаш ца хилла Ростовра бизнесхо Мударов Рамзан.
- 2022-чу шеран стигалкъекъа-баттахь Саратовн кIоштан кхело хийцам боцуш дитира, ша Марксовскан кIоштахь Нохчийчоьнан куьйгалхочун векал ву бохуш хиллачу Дукаев Рустамна дина таIзар. Нуьцкъала ахчанаш дахарна колонихь даккха итт шо тоьхна цунна.
- 2021-чу шеран стигалкъекъа-баттахь Нохчийчоьнан куьйгалхочун Ханты-Мансийскан автономин гонашкара векало Сайдаев Iелас шен доттагIчуьнца-полисхочуьнца йиттинера Азербайджанерчу вахархочунна, дIайигинера цуьнан машен.
- 2020-чу шеран товбеца-баттахь Оьрсийчоьно аннекси йинчу ГIирмехь лаьцнера Нохчийчоьнан куьйгалхочун Ивановн кIоштара векал Эдильсултанов Iийса. Бинчу хаамца, иза бехкевинера хьарамлонца ахча даккхарна а, харц тоьшаллаш дарна а.
- 2017-чу шарахь Украинехь лецира Нохчийчоьнан куьйгалхочун дуьненаюкъарчу уьйрашкахула волу гIоьнча Цицулаев Рамзан. Цунна экстрадици йира Оьрсийчу. Иза бехке веш ву адам лачкъорна а, ахча даккха гIортарна а. Цуьнан гIуллакх кхеле кховдийна.
