Шортта нохчийн хьаькамаш инстаграмера дIабахнашехь, республикан куьйгалхочо Кадыров Рамзана социалан машанах "информацин тIеман гIирс" аьллашехь, шайн инстаграмера агIонаш лелор ца сацийна Нохчийчуьрчу Iедалхошкхьа йолчу зорбанаша а, пабликаша а.
Зазадоккху-баттахь Москван Тверскойн кхело Meta компани экстремисте лерира Коьртачу прокуратуран тIедилларца, цуьнан долахь хилла социалан машанаш дIа а къовлуш. Цул тIаьхьа нохчийн пачхьалкхан зорбанан гIирсаша дIадехира шайн инстаграмера аккаунташ, амма дукха хан ялале машане юхабирзира.
ЧГТРК "Грозный" канало кхин дIа а лелийра шен инстаграмера аккаунт (998 эзар вазвелла стаг), иза дира пачхьалкхан "Путь" телеканало а (166 эзар). Шайн инстаграмера агIо карлайоккху "Чечня Сегодня" сайто (530 эзар), иштта Iедалехьа йолчу нохчийн chp_chechnya паблико (87 эзар).
Meta компанин социалан машанаш дIакъовлар Кадыров Рамзана "чIогIа шен хенахь" бина сацам бу, элира: "Со тешна ву, ша-шега ларам болчу муьлхха а нохчочо а, Оьрсийчоьнан вахархочо а буьззинчу барамехь къобалбо вайн махкахь оцу компанин гIуллакхдар дехкарца боьзна сацам", - яздира регионан куьйгалхочо телеграмехь.
Мeta компанина дуьхьала арз даккхаран бахьана дара Facebook-ан хийцаелла политика, цо аьтто бора украинерчу пайдаэцархошна оьрсийн тIемалошна тIехь ницкъбаре кхайкха.
Фейсбук, инстаграм лелор - иза Оьрсийчоьнан низам хадор дац, церан долахо Meta компани экстремистийн цхьанакхетаралла лерина ялахь а.
Зазадоккху-беттан 28-хь болх бан йолалур ю оьрсийн социалан маша Rossgram. Оцунах лаьцна дуьйцу проектан официалан сайтехь. Билгалдоккхуш ду, Оршот-дийнахь дуьйна социалан машанах пайда эца йиш хир ю партнерийн – зорбана гIирсийн, инвесторийн а, цул тIаьхьа шен болх шорбийра бу цо блогерше а, рогIерчу пайдаэцархошка кхачалц.
- Чиллан-баттахь инстаграмо дIакъевлира Нохчийчоьнан куьйгалхочо лелош хилла @ya_pomoshnik_kra_95 аккаунт. Исс миллион стаг вара оцу аIгоне язвелла. Социалан машано важа агIо дIакъевлинчул тIаьхьа йиллина яра и аккаунт.
- Дуьххьра Кадыровн инстаграмера а, фейсбукера а агIонаш дIакъевлира 20I7-чу шеран ГIуран-беттан 23-чохь – Нохчийчоьнан куьйгалхочунна "Магнитскийн тептаран" гурашкахь санкцеш туьйхира. ХIетахь цо дIахьедира, Mylistory социалан маша белларх Нохчийчохь. Амма нахалахь баржанза бисина и маша. 20I8-чу шеран аьхка Нохчийчоьнан урхалхо инстаграмехь za_kadyrov_95 аьлла, аккаунт йиллира. Амма иза а дIакъевлира.