Ялх шарна таIзар дина хилла Нохчийчуьра Исаев Исмаил 15 дей-буьйсий даккха карцере хьажийна. Краснодар-махкарчу ИК-11 колонехь хан токхуш ву иза – Чиллан-баттахь Исаев а, цуьнан ваша Магамадов Салехь а бехкевира Нохчийчуьрчу кхело гIаттамхошна гIо латтийна ву аьлла. Вежаршна тIаьхьабовлар церан ориентацица дузу бакъонашларъярхоша.
Исаев карцер чу дехьаваккхарх хаамбира ОВД-Инфо ресурсе "СК SOS кризисан тобанан" секретаро Розанов Мирона. Цуьнан дешнашца, Исаевс дийцинера, иза бехкевинчу гIуллакхехула карцере хьажор - "деш хIума ду" аьлла, колонин белхахоша кхеторах.
Оцу юкъанна, Товбеца-беттан 15-чу дийнера схьа дуьйна хууш дац, стенгахь ву Магамадов Салехь – цуьнан адвокаташна а, бакъонашларъярхошна а цунах лаьцна хоуьйтуш дац. Хьалхо яздора, Магамадов "Владимирский централ" олучу, лоьмар 2 йолчу набахте дIавигина аьлла, амма цигахь вац иза.
20 шо долу Магамадов а, 18 шо долу Исаев а бехкевеш таIзар кхайкхийра Нохчийчуьрчу ТIехьа-Мартанан кIоштан кхело кху шеран Чиллан-беттан 22-чохь. Апелляцин инстанцехь Стигалкъекъа-беттан 11-чохь Нохчийчуьрчу Лакхарчу кхело листина гIуллакх хийцам боцуш дитира. ГIаттамхошна гIо латтийна ву аьллачу Магамадовна бархI шо хан туьйхира набахтехь яккха, Исаевна – ялх.
- Магамадов а, Исаев а къар ца ло, шаьшиъ цхьана а хIуманна бехке вац бохуш. Адвокаташа тергалдо бехке хиларх тоьшалла дина цахилар а, кхел йоьдучу заманчохь низамаш дуккхаза дохийна хилар а, царна хета, вежаршна тIаьхьабовлар церан сексуалан ориентацица а, гендеран идентификаллица а доьзна хилар (цу шиннах цхьаъ гей ву, важа гендере дехьавала дагахь хиллера), иштта Нохчийчуьрчу Iедална оппозицехь йолу телеграм-канал лелор.
- 2021-чу шеран Чиллан-баттахь Магамадов а, Исаев а лачкъийра Нижний Новгородерчу кризисан хIусамера, и шиъ Нохчийчу дIавигира. 2021-чу шеран Марсхьокху-баттахь цара дIахьедира, шайна йетта, бехкаш тIелаца бохуш. Царна тIехь къизаллаш лелорах бехктакхаман гIуллакх доло реза ца хилира Нохчийчуьра Талламан комитетан урхалла.