Коьртахь йовлакхаш доцуш деша бераш чу ца дитина Дагестанерчу Кайтагскан кIоштарчу Маджалис эвларчу школан директоран гIовс Курбанкадиев Адамкади балхара дIаваьккхина. Кайтагскан кIоштан дешаран декъан хьаькамо Магомедов Шемала бина и хаам, яздо "360" телеканало.
Коьртахь хIума йоцу дешархой-йоьIарий пенаца дIа а хIиттийна, школа чу ца буьтуш яьккхинчу видеоно йоккха гIовгIа эккхийтинера. Оцу гIуллакхан хьокъехь талламбар дехнера Дагестанан прокуроре Оьрсийчоьнан бакъонашларъярхочо Москалькова Татьянас.
Кху беттан 6-чохь дийца даьккхира, Дагестанерчу Маджлис эвларчу цхьана школехь берийн дайша-наноша латкъамаш барх, шайн берашна коьртахь йовлакхаш а долуш школе дахкар тIедожийна аьлла.
Масех шо хьалхка Нохчийчохь парламенто хийцамаш тIеийцира дешарх лаьттачу низамехь, цаьрца а догIуш, дешархой декхаре бира динца а догIуш духар лелон доьшийлашкахь.
