ТIекхочийла долу линкаш

ЦIеххьана кхаьчна хаам!
Бзаров Аслан

ГIалгIайчуьрчу "Э" Центран белхахоша кхелехь юхаэцна шаьш шайн куьйгалхочунна дуьхьал дина хилла тоьшаллаш

Нальчикехь хоттуш ду ГIалгIайчуьрчу полицино нахана гIелонаш ярца доьзна дов. Бехкебечу ницкъхошна дуьхьал тоьшалла дан кхайкхина цаьрца болх бинарш. Цара юхьанца дийцинера нах полице муха кхачабора, цигахь уьш муха хьийзабора. Дийцинера, масала, муха вийра банк яхьар толлуш лаьцна Долиев Мохьмад.

ХIинца тешаш-полисхой юхабевлла шаьш хьалха дийцинчух. Уьш оцу \бехкебечарна жоьпах хьалхабовла аьтто беш хьийза, аьлла хета эшам хиллачийн агIонна.

"Кавказ.Реалиино" хаийтина ма-хиллара, Нальчикерчу гарнизонан кхело луьстуш ду ГIалгIайчоьнан полицехь болх бинчу нехан дов. Царна бехкедо нахана тIехь Iазап латтор а, адамаш дайар а. "Э" Центран коьртехь лаьттина Хамхоев Тимур а, цуьнца болхбинарш а бу кхеле ийзийна. Церан карах гIело лайначийн терахь ду 10, велла Долиев а лерича.

Несаран кIоштахь Талламан комитетан декъан куьйгалхо волчу Тангиев Зеламхига хаттар дира кхело, ловзаргахь герз кхийсина аьлла лаьцначу вахархочунна Аушев Мохьмадна хьан хIун таIзар дира, аьлла. Цо шена хIумма а дага ца догIу, элира. ТIаккха кхелахочо дIадийшира цо хьалха дина хилла даре.

Оцу дарено бахарехь, Тангиевс омра а дой, кхачош хилла Аушев Мохьмад изоляторе. Цунна хиина, лаца сацам байта кхеле вигинчу Аушевна вон хиллийла а, цуьнан дегIа тIехь йиттина дерташ дуйла а. Тангиевс шена ца хаьа, муха хилла и дараш, амма цунна уьш полицехь дина дац, аьлла яздина ша хьалха даредеш.

Шен вешин ловзаргахь маса топ йиттина аьлла, Аушев Мохьмад лоцуш дакъалаьцна ву теш, полицин белхахо Албогачиев Яхьъя. ХIинца цо кхеле шена ца хаьа, дага ца догIу боху, мила вара Аушев полицин хIусамера "Э" Центре дIавигийтинарг.

"Хьенан кара дIавелира ахь айхьа полице валийча Аушев Мохьмад", кхело хаьттича, "ас иза учахь витира, цхьаьнгге а дIа ца велира", жоп делира Албогачиевс. Шена хезира, боху, кхеле вигича Аушевна вон хилла бохуш, амма цунна гIело цхьаммо а ца йинера, элира полисхочо.

"Э" Центран информацин-аналитикан декъан белхахочо Муталиев Iелас шега динчу хеттаршна жоьпаш луш, Долиев Мохьмад лаьцнарш къепе хIотто леррина вовшахтоьхначу тобанера (СОБР) бара, элира. Ткъа шена ца хаьа Долиев, Муцольгов, Аушев, Назаров лоцуш билггал хIун лелла, аьлла, дерзийра. Долиев цуьнан цIахь, куьйгашна гIоьмаш тоьхна вайра шена дуьххьара, шозлагIа – "Э" Центрехь цIенкъахь Iуьллуш, кхин а хан яьлча хезира иза велла аьлла, дийцира Муталиевс.

Амма оццу белхахочо, Муталиевс, ша хьалха, талламчашна жоьпаш луш яздинчу тоьшаллехь боху, Долиев лаца омра динарг "Э" Центран хьаькам Хамхоев Тимур вара. Ткъа хIинца кхеле элира, ша шега динчу хеттаршна жоьпаш луш хIиттийначу тоьшаллин кехаташна буха, деша а ца доьшуш, куьг яздира.

Зен хиллачийн адвокато дийхира кхеле, харцдерг дийцарна хIун таIзар догIу тешашна дIахаийтар. Оцу къамело оьгIазбахийтира бехкебечийн адвокаташ.

"Кавказ.Реалица" къамел деш зен хиллачех йолчу Юсупова ПетIамата, ша тешна ю, элира, кхело лебина нах шайн ма-хуьллу бехкенаш тIаIзарна кIелхьарбаха гIерташ хиларх.

"Хьалха дина тоьшаллаш хIинца дечех, стигаллий, латтий санна, къаьсташ ду. ХIинца царна хIумма а "дага ца догIу", "ца гина", "ца хаьа".

Амма ницкъ беш а ца даьхна цаьргара хьалха цара дина тоьшаллаш. Сан вешин Долиев Мохьмадан хIусаме дуьххьара ваханарг Аспиев Iиса а, Муталиев Iела а, Богатырев Тимур а ву. Граната чуйиллина, тIаккха иза тIехьадихкинчу куьйгашца дIалацийтина, пIелгийн ларш йисийта, юха чохь къоланаш дина.

Кхузахь, Хамхоев Тимурна хьалха шаьш хIиттийча, юхабевлла хьалха динчу дарех. Массо а цхьабосса бIаьрзе а хилла, къар а боьлла, шаьш хьалха кехаташна куьйгаш муха таIийра а ца хаьа," – дуьйцу тешашна резайоцчу Юсуповас.

Цо бахарехь, рогIехь кхело лейийр ю зен хилла Гадиева Аза.

"Иза БуьритIехь набахтехь ю, видезIенехула дийр ду цуьнца къамел, кхиболу тешаш ницкъаша балор бу кхеле", - хаам бира Юсуповас.

Шуна хетарг

Гайта комментареш

Эдельгериев Путинан хьехамча а веш, цунах мукъадаьллачу министрийн кабинетан дарже Хучиев хьажоро хIун хийцамаш бахьар бу аьлла хета шуна?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG