Мангал-беттан 8-чохь Кадыровн 17 шо долчу кIантана Элина а, 16 шо долчу Адамна а нускалш далийна Нохчийчохь къайлах той хIоттийнера. Нускалш далош йогIучу коврано йохийнера дуьхьал йогIу машен, йаздо "Новая газета Европа" хьасто. Цу шиннан нускалш ду Оьрсийчоьнан думин депутатан Делимханов Адаман а, сенаторан Геремеев Сулейманан а гергара берхIийтта шаре довлаза зудабераш. Ший а ву федералан тIегIанехь Нохчийчоьнан цIарах лелаш.
Той хIотточу дийнахь федералан "Кавказ" трасса дIакъевлинера республикера ГИБДД-н белхахоша, делахь а цхьа жима машен къевлинчу некъа тIехь дуьхьал йогIуш хиллера. Коврана йукъарчу гIагI диллинчу машенах кхетта и. "Новая" газетан хьастийн хаамашца, дуьхьал йогIучу машенахь хилларг дарбанан цIийне охьавиллина. Ловзар дIадаьхьна къайленехь: цигахь хиллачу дуккхаъчу хьешашна дихкинера цунах лаьцна хьахон, ткъа ша Кадыровс дуьйцуш хIума дацара йа хиндолчу тойнех а, йа нускалех а лаьцна.
Кадыровн шолгIачу кIанта Кадыров Элис зуда йалорах дийцира нохчийн оппозицин телеграм-каналаша Кремлехь президентаца Путин Владимирца цуьнан цхьаьнакхетар хиллачул тIаьхьа. Цуьнан нускал ду, боху "Новая газето", Делимханова Хедин йоI – Оьрсийчоьнан парламентан Делимханов Адаман йоьIан йоI. Хедин шен хене а, иза маре йахначу хене а хьаьжча, цуьнан йоьIан 14 шо хила тарло, билгалдоккху публикацихь.
Кавказ.Реалии сайтан хьасташа хьалхо дуьйзира Элин нускал Делимханов Адамца: делахь а йуьйцург депутатан йоьIан йоI йац, йишин йоI йу аьлла, тешна бу уьш.
КхоалгIа кIанта, Кадыров Адама йалийна нохчийн сенаторан Геремеев Сулейманан йоI – цуьнан нускалх лаьцна кхин хууш хIума дац. Геремеев Сулейман Нохчийчоьнан урхалхочун Кадыров Рамзанан уллорчу гонера стаг ву, иза Делимханов Адаман шича ларалуш ву.
Кадыровн йоIе Iайшате хиттира мангал-беттан 11-чохь Делимханов Адаман йоI хьан вашас йалийна бохург бакъ дуй аьлла, цо доцца жоп делера "дац" аьлла (скриншоташ йолуш йу редакцин долахь). ШолгIачу дийнахь, муха дIадирзира ловзар аьлла шега хаьттича, мехкан куьйгалхочун йоIа жоп деллера "чIогIа кIадйелла" ша, амма дерриг а "дика дирзира" аьлла.
- Нохчийчуьра Iедал цIеххьана хийца дезахь а бохуш, Кремлехь сценарий кечйан буьлабелла аьлла хаамаш баьржинчул тIаьхьа Кадыров Рамзанан могушалла йуха а йийца йаьккхина. Бахьана ду боху политикан лазар чIагIлуш хилар. Шен ма-хуьллу, массо а агIор и бакъ дац бохуш, нах тешон хьийза мехкан урхалхо, масала, спортзалехь йохучу роликашца.
- Зазадокху-баттахь Кадыров Эли хIоттийра республикера боксан федерацин президент а, латархойн "Ахмат" клубан коьрта директор а. Официалехь цхьа а дарж доцуш, цо зуда йалайале хьалха тIеийцира иза Оьрсийчоьнан президенто Путин Владимира Кремлехь.
- СИЗО-хь Журавель Никитина йеттар бахьана долуш скандал иккхинчул тIаьхьа 16 шо долчу Адамна дуккха а совгIаташ дира. Шен ден кхерамзаллин хьукматан куьйгалхо вира цунах, Росгвардин, ТIеман министраллин батальонийн куратор хIоттийра, ишта "Оьрсийчоьнан спезназан университетан" куратор а. Цигахь кечбеш бу Украинерчу тIаме хьийсон лаамхой олурш.
- Шен хьал цхьана эшарехь доцчу хьелашкахь Кадыров декхаре ву оцу кепара гIулчаш йаха, ишта иза цомгаш ву бохуш, хабарш хезорна а, тешна бу Кавказ.Реалии сайто хеттарш дина эксперташ.
