ТIекхочийла долу линкаш

ЦIеххьана кхаьчна хаам!

Адамаш дакъошкахь духку лоьраш лецна


Трансплантаци еш бу лоьраш
Трансплантаци еш бу лоьраш

Къелла дан амал доцуш бисинчу наха шайн дегIан межеш юхкуш хилар шуьйра даьржина ду дуьненчохь. Эцархойн могIаршлахь Европера кхиинчу пачхьалкхашкара тароне нах хуьлу. Бакъду, и тайпа йохк-эцарш, дукхахьолахь нахала ца доккхуш, къайлаха леладо, уьш низамца цхьаьна догIуш ца хиларна. Амма Германехь иза чекх ца даьлла...



Немцойн Гёттинген-гIаларчу лоьрийн цIийнахь болх беш волу ши лор ву меттигерчу Iедалхошна, низамца йоцу адамийн кийрчу меженийн трансплантацеш еш гучу ваьлла, талламе лаьцнарг. Шина шарахь цамгарийн тоьшаллаш, шайна товчу агIор хийца а хуьйцуш, кхаънаш ийдеш хиллачу цу шиммо, шайна ахча дел-делла лазархой хьалха а тоьттуш, царна операцеш еш, ткъа царел а сихо трансплантаци а оьшуш, таьIна болу, амма ахчанца таронаш якхий йоцу нах тIаьхьатоьттуш хилла, бохуш, чIагIдо полицино.

Масала, шайна каракхаьчна волчу лазархочунна цара цуьнца данне а йоцу чолхе цамгарш тIеяздеш хилла, иза трансплантацина рогIехь лаьттачарел хьалхаваккхархьама. Аьр вай, доIахца цамгар йолчу лазархочуьнца цул совнаха кхин а кхераме жанний лазарш а ду, цундела цунна ечу операцина сихо ян а еза боху сацамаш язбеш хилла шайн клиеттийн анамнезехь. ХIинца цу шинна дуьхьал бехкталламан гIуллакх схьадиллина.

И тайпа инзаре харцонаш Германехь шерашкахь лелон лоьрийн аьтто баларх инзаръяьлла немцойн юкъаралла а, лоьрийн цхьанакхетараллаш а. Сихонца гулйинчу пресс-конференцехь Гёттингенерачу лоьрийн цIийнан коьртачу лоьро Фрайтаг Себастьяна гучудаьллачух шен инзарвалар довзийтира.

Фрайтаг Себастьян: „Я хьалха а, я хIинца а и санна хIума вайн махкахь хила йиш ю бохург цкъа а дага ца деанера суна. Дагахь а доцуш, валар нисделча, шен кийрара меже цомгушчарна хьажаяр весете дилларна нах тIеберзо гIерташ вай юкъараллехь дискуссеш дIакхоьхьочу муьрехь йоккха катастрофа ю иза.“

ХIинца меттигера прокуратура толлуш ю, цу шина лоьро лелийна харцонаш бахьана долуш, меженийн трансплантацешка сатуьйсуш Iийначу лазархойх цхьа а вала-м ца велла теша бохучунна. Карарчу хенахь цу лоьраша харцонца 25 лазархочунна трансплантацеш яран операциш йина хилар тIечIагIдан аьтто баьлла Iедалхойн. Ткъа цу шиммо гергарчу хенахь операцеш ян кечвина хилла волу кхин а 25 лазархо а гучуваьлла. Цара а лоьрашна кхаьънаш делла хиллий теша бохург толлуш ду полицино.

Карарчу хенахь еккъа цхьана Германехь 12000 стаг ву, кийрахь меженийн трансплантаци яре хьоьжуш. Дукхахьолахь царна оьшурш жаннаш я доIах хуьлу. Амма иштта дегIан чкъор а, букъатIум а, дог а, кхийолу межеш а хила йиш ю царна юкъахь.

Немцойн махкахь цхьаннан а могушчуьнгара меже эца бакъо яц, цунна мах а белла я кхидолу совгIат а дина. Деккъа цхьаммо шен маьршачу лаамца, мехаза, шен меже, ша дийна волуш я веллачул тIаьхьа, цомгушчунна дIаяла бакъо луш весет дича бен, бакъо яц лоьрийн цхьанггера и меже схьаяккха, я дийначуьнгара а я веллачуьнгара. Иза теори ю. Ткъа дахарехь и низам дохон некъаш хилар Гёттингенерчу лоьрийн цIийнахь хIинца гучуьдаьллачо гойтуш ду.

Хиламо карладоккху, Нохчийчохь тIом боьдучу хенахь оьрсийн эскархоша, я олуш ма-хиллара, муьлш бу ца хуучу герзахоша лецначул тIахьа доьза байна нохчийн кегийн нах я зудабераш жимма хан яьлча цхьанхьа гIалийн йистошкахь баъйина схьакарийча, церан догIмаш тIехь, цIонгитIера вортане кхаччалц, лоьрийн маха баьккхина, уьш дIатегна ларш гуш хилла хилар.

ХIетахь фоторепортераша даьхна дисина сурташ а ду цунна тоьшаллина. Иштта байъинчийн гергарчарна хетарехь, шеко яц , церан нехан лоьрийн хьашташна кийрара межеш яьхнийла цу межешца къайлаха мах лелочу зуламхоша.

И саннарг шерачу майданахь я цхьанхьа, оьрсийн эскархой Iачу лаьттан тоьланашкахь дан йиш йоцуш, чолхе хIума хиларна, Нохчийчохь шуьйра даьржина дара оьрсийн эскархошца цхьана цу зуламийн декъахь лоьраш а бу, бохуш.

Бакъду, и тайпа лоьрийн мехий даьхна байъина схьакарийна маьрша нах Нохчийчохь мел дукха хиллехь а, цу хьокъехь я оьрсийн а, я нохчийн а Iедалша хIинцалц дIабаьхьна цхьанна а тайпа талламаш бац.
XS
SM
MD
LG