ХIокху тIаьхьарчу хенахь, Абхазин бахархой цхьа тамашийна юкъаметтигаш йолуш бу шен лулахочуьнца, Оьрсийчоьнца. Абхази йозуш ца хилар къобалдинчу Москохана, хIинца мах а ца луш, цу республикин курорташ йолу латтанаш дезаделла.
Маршо радионо дагадоуьйту, оьрсийн премьеро Путин Владимира даханчу шеран гуьйренан юьххьехь, Оьрсийчоьнан Ха Даран Сервисана а, Арахьарчу Гiуллакхийн Министраллина а, уггар а езачех йолу кхо объект Оьрсийчоьне дIаяларца боьзна барт Абхазица чIагIбе аьлла, тIедиллина хилар. Ткъа и гIишлош тIехь долу латта, премьеран хьесапехь, Абхази Гуьржийчоьнах кIелхьаръяьккхинчу Оьрсийчоьне дала дезаш ду 49 шаранна. Цул тIаьхьа и хан ях а еш, хIоара шарахь, цхьана кертах цхьа сом ахча а луш. И доцург а, оцу бертан цхьана декъо бахарехь, шайна луург оцу латта тIешь ян йиш йолу Оьрсийчоь. Оцу объекташкахь болу оьрсий, абхазахойн низамаш кхочушдарх мукъа баха безаш а бу.
Лулахой лулахой бу, амма шайн латтанаш цара кардерзорна реза бац абхазаш, цхьа мехкан куьйгалхо БагIапш Сергей воцург. Шен къам кхетон хьаьжна иза – Абхази йозуш ца хила хьожучу хенахь, Оьрсийчоьно доккха накъосталла дина. Цунна дIа хIунда ца луш ю, цунна езарг? - бохуш.
Абхазин къилбседехь а, къилбседа-малхбузехь а долу дозанаш билгадахар хьокъехь дийцарш дан, Зазадоккху беттан 28-чу дийнахь Оьрсийчу яхана ю Абхазера делегаци. Оханан беттан хьалхара де тIекхачале, оьрсийн арахьарчу гIуллакхийн министраллехь дIахьур ю, Оьрсийчоьнна а, Абхазина а юкъара дозанаш керлачу кепара нисдаран хьокъехь шолгIа кхеташо дIахьур ю, шина агIонан комиссино.
Гуьржийн Iедалийн хьесапехь, и дагадовларш а, берташ а, низаман бух болуш дац.
Малашхиа Шотас, Гуьржийчоьнан цхьаалла меттахIоттон Iалашонца, ханна кхоьллинчу, парламентан комиссин гIантдас элира Маршо радиога вистхуьлуш.
Малашхиа Шота: Дуьненаюкъарчу низамашца дуьстича, оккупанто-пачхьалкхо а, цуо кхоьллинчу режимо а дозанаш хийцаран хьокъехь, Гуьржийчоьнан пачхьалкхан дозанехь беш болу берташ, низамехь бац. Демократин процесс йолаелча и хаттар къастор ду. ЛортIехь хIума ма дац, оккупаци йинчу латта тIехь бехаш болчу нахе, кхин а сов халонаш лан еза бахар.
Абхази а, Къилб ХIирийчоь а, Оьрсийчоьно оккупаци йина, шен латтанаш ду бохучунна тIехь лаьтта Тбилиси.