Лаккхара Нохчийчоьнан совгIат – Кадыровн цIарах орден йелла Темрезов Борислина, Кхарачой-Чергазийчоьнан куьйгалхочун Темрезов Рашидан да ву иза. Стохка гурахь Кхарачой-Чергазийчоьнан лаккхара совгIат дира Кадыров Рамзанан жимахволчу кIантана, СИЗО-хь лаьцна латточунна йиттинчу йукъахь.
Черкесскера дарбанан-реабилитацин центран коьрта лор ву Темрезов Борисли. СовгIат дарх Нохчийчоьнан куьйгаллин сайтехь зорбане даьккхинчу омрана тIехь йаздина ма-хиллара, Кадыровн орден кхачийна цунна "Оьрсийчоьнан пачхьалкхалла кхиорца доьзна даккхий гIуллакхаш дарна а, дуккха а шерашкахь могушалла Iалашйарехь а, лоьрийн Iилманехь а кхахьегарна а". Темрезовс дина гIуллакхаш Нохчийчоьнца муха доьзна ду, хууш дац.
Соьлжа-ГIалара СИЗО-хь Адама лаьцначунна йетташ видео йаьржинчул тIаьхьа Нохчийчоьнан урхалхочун 15 шо долу кIантана Кадыров Адамна орден йелира "Кхарачой-Чергазийчоьнна гIуллакхаш дарна" аьлла – регионан лаккхара совгIат ду и. Йиттинера цо 19 шо долчу Журавель Никитина, оцу заманчохь КъорIан дагорна бехкевеш лаьцна вара иза. Дахначу кIиранах 3,5 шо хан кхайкхийра цунна набахтехь йаккха.
Кхарачой-Чергазийчоьнан орден йеллера Кадыров Адамна "регионашна а, къаьмнашна а йукъахь цхьаалла кхиорехь цо дакъалацарна, исламан ламастин мехаллаш чIагIйарна". Цунах лаьцна дIакхайкхийра Кхарачой-Чергазийчоьнан куьйгалхочо Темрезов Рашида шен телеграм-каналехь.
2013-чу шарахь йукъадаьккхина ду совгIат. Омраца а догIуш, и дала кхачадо шен говзаллехь мел лахара а 20 шарахь къахьегначарна а, цхьана кепара урхаллин совгIат долчунна, йа йеза цIе лелош волчунна.
- Лахьан-баттахь Кхарачой-Чергазийчоьнан муфтийс Бердиев Исмаила "Умматана хьалха гIуллакхаш дарна" аьлла I-чу барамера орден йелира Кадыров Адамна.
- Кху шеран чиллан-баттахь Дубайхь хIиттийначу спецназан UAE SWAT Challenge къийсадаларшкахь мидал йелира Кадыров Адамна. Тоьлла жамI гайтира, Нохчийчуьра чоьхьарчу гIуллакхашкахула йолчу лерринчу полкан эскархойх лаьттачу "Ахмат" тобано. Республикин урхалхочун кIанта дакъа ца лецира къийсадаларшкахь, амма совгIат схьаэца сцени тIе велира массарел а хьалха.
- Кадыров Адамна керла дарж делира республикехь: куратор хIоттийра иза Оьрсийчоьнан тIеман министраллина чуйогIучу Шейх Мансуран цIарахчу батальонан. Цул а масех кIира хьалха, оцу заманчохь I5 шо долу Кадыров Адам шен ден "кхерамзаллин декъан" куьйгалхо хIоттийра. Дечкен-баттахь оцу даржехь а волуш, кхерамаш тийсира цо Малхбузера а, Украинера а шен ден "мостагIашна".
