ТIекхочийла долу линкаш

ЦIеххьана кхаьчна хаам!

Хасаров ШаIрани. Хала ду ваха


Нохчийчоь --Тевзана, 2016

please wait

No media source currently available

0:00 0:00:55 0:00
Линкана тIе

Хала ду ваха

Со матто хьистина,
Чийхийна иштта,
Дукха нах гIиртина
Тхан девнаш листа.
Тахана цуьнгара
Ледарло яьлла,
ДоггIуче и цхьа дош
Цо дIа ца аьлла.

Матто и беза бехк
Суна тIе тоьтту.
«Хьо воцург мила ву
Бехкениг?» - хоьтту.
Оьшшучу киртигехь
Само ца ярна,
Берриг бехк тIе тетти
Оха цу дагна.

Амма дац иза цу
Балхана реза.
Сайн хила дийзи сан
Бехкана къера.
Кхолламийн духаршна
Вайн денош доруш,
СхьадогIун дахар ду
Со гIалатвохуш.

Дахаро садуу.
Дахар бу бала.
Дахаран йовхо ю
ХIораннан канахь.
Цо мотт а, цо стаг а
Дагах дIахутту,
Стаг дийна кхосаберг
Хуьлий дIахIутту.

Вовшашна Iитталуш
Ирий и сенаш,
Вай хала йохуш ю
Дуьненчохь хенаш.
Шайх тарван гIерта нах.
Хьийза во наха.
ТIаьхь-тIаьхьа хала ду
Стагана ваха.

2012-шо.

Хасаров Темуркъин ШаIрани вина Казахстанехь Кзыл-Ордан мехкан Терень -Узецки кIоштарчу Кокжиде юьртахь 1953-чу шеран 22-чу октябрехь.

Цо дешна Нохчийчохь ша вехачу Дишни-Веданарчу юьртан школехь. Цул тIаьхьа агрономан говзалла караерзош 1972--чу шарахь чекхъяьккхина Серноводскера юьртабахаман техникум, ткъа 1982-чу шарахь чекхъяьккхина хIинца Владикавказ олучу гIалахь хилла Ламанхойн юьртабахаман институт. 1972-1974-чу а шерашкахь гIуллакх дина Советан эскарехь.

Тайп-тайпана белхаш бина комсомолехь, "Колхозан дахар " Веданан кIоштан газетан редакцехь, юьртабахаман декъехь, КПСС-н Веданан райкомехь.

Дахаран доккха дакъа дIаделла хьехархочун балхана - дерриге а 25 шо, цуьнах 20 шо дIадахана юьртарчу школехь берашна хими а, биологи а хьоьхуш.

Кхоллараллин некъ дIаболийна 1971-чу шарахь. 1986 чу шарахь «Сатасаран сахьт» байтанчийн гуларехь стихийн цикл араяьлла.

1991-чу шарахь араяьккхина "Дашон хьоза" цIе йолу берийн стихийн гулар. Ехха зIе латтийна берийн "СтелаIад" журналца, баккхийчеран стихаш араевлла нохчийн журналашкахь а, газеташкахь а.

2010-чу шарахь дуьйна Оьрсийчоьнан яздархойн бертан декъашхо ву, 2011 чу шарахь "Республикан хьакъволу журналист" цIе тиллина поэтана.

Веданарчу "Керла дахар" газетехь корреспондентан цIарах болх бина цо.

Хасаров ШаIрани кхелхина 2020-чу шеран Зазадоккху-беттан (март) 22-чу дийнахь.

Оха хьоьхург

XS
SM
MD
LG