Дикаев Мохьмад
Дог лозу сан
Гуьйранна мажделла
ГIаш лаьтта оьгуш,
Хета, уьш акхтарган
ГIайгIанна оьгу.
Стиглара, кхевссина,
ДогIанаш оьхуш,
Хета уьш стигланийн
Балано кхоьхьу.
Ткъа латта, мохк бегош,
Топ хилла, лелхаш,
Хета и, даймехкан
Дог оьцуш, доьлху.
Сингаттам боьссича
Готтачу кийра,
Хета и, ненан аз,
Узам беш гIийла.
Дикаев Мохьмад похьмаллин нохчийн байтанча вара. Иза винера 1941 шеран Гезгмашин-беттан 1-чу дийнахь Соьлж-ГIалахь, кхелхира 1979 шеран ГIадужу-беттан 29-чу дийнахь. Дикаев Мохьмадан байташ дуьххьара зорбанехь араевллера 1960 шераш дуьйлалуш нохчийн маттахь долчу газетийн а, «Орга» алманахан а агIонаш тIехь. Поэтан шен дуьххьарлера жайна арадаьлла 1965 шарахь. «Нохчийн хIусам» яра жайнин цIе.
