***
Сайн лазамо вагийначохь тIетевжийла хилча-м,
Сайн дегIан чарх коше ерззол лаьттан аса хилча-м,
Юкъ яьстина цкъа пхьор даъал дуьне маьрша хилча-м,
Идавойтур вацарий ас сайн кхолламе суо...
Ког левзича цхьа лар йиссал некъатача хилча-м,
Куьг кхевдича йовхо йиссал кхерчахь алу хилча-м,
Сан цхьалхачу синан гIаларт хьеста илли хилча-м,
Хьийзавойтур вацарий ас сайн кхолламе суо...
Сайн уьйрашна са ца гаттол собаре суо хилча-м,
Кху дуьненахь орам хеццал доьналла сайн хилча-м,
Сайн чаьлтанчин дашах тешшал догцIена суо хилча-м,
Iехавойтур вацарий ас сайн кхолламе суо...
Сайн хьагалле сатессина шовда дуйла хиъча-м,
Сан аз хаза сатессина лаьмнаш дуйла хиъча-м,
Сан сибат ган сатессина бIаьргаш буйла хиъча-м,
Воьхур варий даггара ас Везчу Деле суо...