ТIекхочийла долу линкаш

КIезиг хIуманаш юьхьар а лоьцуш, даккхий зуламаш могуьйтуш Iачу прокуратурах цецбуьйлу бахархой.

Йоккхачу самонца, цхьа элп гал ца долуьйтуш, низамана гIароллехь лаьттачу прокуратуро, кест-кеста, бехк токхаман гIуллакх а долош а, долонза а кIадбоцчу хIуманна а жоьпе ийзабо бахархой.

ТIаьххьара ишта жоьпе озийначех цхьаъ ю яхархо Ахмадова Iайшат. Цунна бехке дуьллуш ду Оьрсийчохь нажжаз йинчу, талорхойн цхьаьнакхетар лоручу ДаIиш тобанан символика интернет машанехь яржор.

Прокуратуран хьостано гIардаккхарца, цунна дуьхьал гIуллакх а долийна кховдийначу бехкаца, цунна 2 эзар соьман барамехь гIуда тоха тарло я 15 де-буьйса набахтехь даккхийта а мега.

Диъ шо хьалха Кемерово кIоштан кхело экстремизман кхайкхам-чулацам болуш лерина иллиалархочун Муцураев Тимуран эшарш бахьанехь прокуратуран белхоша само яр бахьанехь, Нохчийчохь таIзарш динарш ши-кхоъ хилла ца Iа.

Уьш сецор а, царна тIеIаткъам бар а могIарера а гIуллакх а хилла дIахIоьттина кхузахь.Бала безачу могIарерчу нахана тамаше хетарг а, цаьрга кхета цалург а ду, ког баькх-баьккхинчохь комаьршша низамаш талхош а, тIе когаш беттачу суьртехь дуй те аьлла, хьоьшуш хилар тидамза а дуьтуш, мехкан прокуратура ши куьг хаьдча санна Iар.

Масала, кху бовш болчу ГIуран-баттахь, цхьанна-м юххера я генара гергара хиларг доцург, кхин бехке боцу чот йоцуш дукха бахархой лецна ницкъаллин структураша, партал Iаш низамхойн урхалла а йолуш.

«Шайн лаамехь» гуламашка а хIуьттуш наха шаьш махках баьхнарш а, бохуш берш а бийца а ца оьшу. Цхьаболчу тергамхошна хетарехь, Оьрсийчохь прокуратуран белхой а, Iедалехь берш а цхьаьна дIа а божабелла бертахь «къахьоьгуш» бу.

Вуьшта аьлча, боху цара Iедалехь болчаьрца бертахь а боцуш Оьрсийчохь низамхоша болх бойла дан а дац. Ишта хьажам болчех ву соьлжагIалахо Асланбек.

Асланбек: «Кху Оьрсийчохь Iедална реза а боцуш прокуратураша болх хир яц. Шаьш бохург ца дахь, Iедалхоша царна алапа лур а ма дац. Iедална мегаш дерг прокурорана мегаш ду-кх, дацахь цунна а ца мега. Нохчийчохь а ду изза дIо-о коьртехь,урхаллехь а ду изза.

Низам лардеш гIароллехь бу хIорш-м аьлла хан кесталгIа йогIур ю аьлла суна-м ца хета. Хенахь гур долуш хIума дац иза. Кхечанхьа хIуъу а делахь, кху Нохчийчохь хуьлийла лаьар-кх суна нийсо а, бакъо а».

Дукха бахархой тешарехь, хIинцалера Iедал Кремлан урхаллехь мел ду, Оьрсийчохь барта дийцарал сов, нийсонан, бакъонан бух тIехь низам дахаре а дерзийна, маьрша, синтеме зама йогIур ю ала хала ду.

Хьомсара “Маршо Радион”доттагIий, шун аьтто бу тхан Facebook-ерчу аккаунтах пайда а оьцуш, тхан дискуссехь дакъалаца. Шун комменташна модераци ян эшарна, уьш сайтехь жимма тIаьхьо гучуевр ю. Нагахь санна тхоьга яийта шайн видео а, аудио а материалаш елахь, шун аьтто бу иза кху телефонца WhatsApp-e я Viber-e схьатаса: 420 724 019832

XS
SM
MD
LG