ТIекхочийла долу линкаш

ЦIеххьана кхаьчна хаам!

Юсупов Iилман. Дуьненан гIовгIанан...


please wait

No media source currently available

0:00 0:00:56 0:00
Линкана тIе

Юсупов Iилман

Дуьненан гIовгIанан къизачу къовкъарша
Лазамах дIайоьлли сан массо шовкъ а.
Баьгначу лаамех йисинчу овкъарша
Къежди сан массо а гIуллакх а, зовкх а.

Сан са ас язъечу байташлахь деттало,
Дешнашца сингаттам дIатуьттуш гена.
Сайн оьмар хьан ломан хих тера хетало -
Нохчийн малх кхеттачу тIехула шена.

Iамийна ас дагахь хьан хIора бохь сайна,
Кхиэло со кхоссарх а хийрачу махка.
Декаш ду сан аз, хьан аьрзунан мохь санна,
Лууш сан мукъамаш хьан иэсехь тахка.

Вац-кха со маьршачу хьан некъах тиллачех,
Деле хьо йоьхуш ду сан хIора де а.
Турпала къам дуьйцу илли а хилла шех,
Екаш ю, Нохчийчоь, хьан сийлахь цIе а...


Юсупов Iилман нохчийн поэт ву. Цо чекхъяьккхина Нохчийчохь юккъера школа а, А.А. Ждановн цIарах йолчу Ленинградан пачхьалкхан университетан историн факультет а. Белхаш бина школехь, газетийн а, журналийн а редакцешкахь, иштта Нохчийн Республикан Ичкерин дешаран а, Iилманан а министерствехь министран хьалхарчу гIовсан даржехь. Юсупов Iилман поэзин ворхI книгин автор ву: «Заманан мазлагIа» (1991), «Доьналлин маьждиг» (1997), «Иэсан гIу» (1999), «Нохчийн кхерч» (шведийн маттахь, 2011), «Илли а, мухIажаралла а» (гIазакхийн маттахь, 2015), «Хьан кхерчан суй» (2015), «Иэсаца къамел» (2016). Юсупов Iилманан байташ араюьйлу нохчийн, оьрсийн, украинхойн, болгархойн, шведийн, ингалсан, испанхойн меттанашкахь. 2001 шарахь дуьйна эмиграцехь ву иза. Карарчу хенахь Швецехь вехаш ву. 2015-чу шарахь Швецин пачхьалкхан яздархойн Союзо шен могIаршка дIаэцна Юсупов Iилман.

XS
SM
MD
LG