Шо шаре йовш лаьтта дуьненчу дуьйлучу берашна хIинццалц тохкуш, лелийна нохчийн орамаш долу цIераш аьлла, "Нохчийчоь Тахана" агенталле елла информаци юхаэцна Старопромыслан кIоштарчу адам кхиар-далар тергонехь латточу урхаллан (ЗАГС) куьйгалхочо Ахмедова Хьасимата. Дукха хьолахь карарчу заманахь Нохчийчохь дуьненчу дуьйлучу берашна тохку бусулба пайхамарийн, церан гергарчийн, накъостийн цIераш. Хан-зама яьлча Нохчийчохь хьалха дайша лелийна хилла нохчийн цIераш юкъара дIайовла там бу аьлла, билгалдаьккхинера цо.
"Нохчийчоь Тахана" агенталло керла хаам зорбане баьккхина, ЗАГС-ан куьйгалхочо шайца зIене а яьлла, и материал харцъяр дехна аьлла.
"Шун корреспондентца дечу къамелехь, оха йийцира тахана шуьйра тахка йолийначу цIерех. Суна ца лаьа, цу тайпа информаци сайгара яржа. Нохчийн цIераш юкъара йовлуш ю бохург ас аьлла дац", - дIахьедина боху Ахмедовас.
Маршо Радионо яздира шен агIон тIехь, агенталлан а, цул совнах, тхоьца зIе латточу бахархойн хаамашна а тIе а тевжина, Нохчийчохь дуьненчу довлучу берашна тохку цIераш хийра хиларх.
