Оьрсийчоьнан тIеман министраллан кеманца Шемара шина шарера ялхийтта шаре девлла 44 бер далийна. Подмосковьерчу Чкаловскийн аэропортехь оршотан дийнахь охьадоьсина кема. Берийн могашалла зийначул тIаьхьа Дагестанерчу а, ГIебарта-Балкхаройчуьрчу а, Ставрополан кIоштарчу а церан гергарчаьрга дIакхачор долуш ду уьш. Бераш цIа дало Шема яхначу Оьрсийчоьнан берийн обудсмено Кузнецова Аннас бина цунах лаьцна хаам.
"ХIинццалчул а дукха бераш далийна оха хIинца - 44 бер. Масех беран могашалла дика яц, гаьргаш еттаелла чевнаш ю цаьрца, уьш лоьрех чекхбаха оьшур ду. Дисинчу берашца цхьа а цамгар ца хааелла, тIейогIучу заманахь церан гергарчу нахе дIакхачор долуш ду уьш", - аьллачу берийн бакъоларъярхочун дешнаш далийна ТАСС агенталло.
2017-чу шарера схьа дуьйна Гергарчу Малхбалерчу тIеман кофликташ лаьттачу меттигашкара Оьрсийчу далийна 274 бер, царех 122 Иракъехь карийнера, 152 Шемахь. Оцу юкъанна юьйцучу пачхьалкхашкахь хIинца а эзарнаш Оьрсийчоьнан бахархой буьсу. Доккхачу декъанна, "Исламан пачхьалкх" шайх олучу организацин тIемалойн зударий а, церан баккхий доьзалш а бу уьш. 2013-чу а, 2015-чу а шерашкахь шайн хIусамдайшна тIаьхьа бахна дукхахболу Къилбаседа Кавказера зударий.