Американ Пачхьалкхан департамента мах балар кхайкхийна 10 миллион доллар барамехь, Американ Федералан талламан сервисо (FBI,ФБР) Оьрсийчоьнца юзучу DarkSide хIакерийн тобанан муьлхха а лидер мила ву къасто аьтто луш болу хаам бинчунна. Цул сов 5 миллион доллар гергга кхайкхийна, муьлхха а муьлххачу а пачхьалкхехь оцу трбан декъашхо лаца аьтто беш информаци еллачунна.
Кхушара Стигалкъекъа-баттахь DarkSide тобанан хIакерш тIелатар дира Американ биргIанаш тосу Colonial Pipeline компанина. Цхьана кIиранна шен биргIанийн машанан болх а сацийна, хIакершна биткоинашкахь 4,4 миллион доллар дала дийзира оцу компанин.
Товбеца-баттахь (июль) Цхьаьнатоьхначу Штатийн Iедало мах балар кхайкхийра 10 миллион доллар гергга барамехь, кхечу пачхьалкхаша де а аьлла, америкахойн объекташна тIелетарш дина киберзуламхой болу меттиг каро гIо динчунна.
Масех ладаме кибертIелатар динчул тIаьхьа, шайна юкъахь Colonial Pipeline биргIа болх бечуьра сацийнарг а долуш, Цхьаьнатоьхначу Штатийн официалан Iедалхоша жоьпалла тIедожийра Оьрсийчоьнан территори тIера зуламаш дечу хIакерийн тобанашна. Америка-Оьрсийчоьна саммитехь Мангал-баттахь Джо Байдена кхайкхам бира Путин Владимире, цара дийриг сацо гIулчаш яхахьара аьлла. Делахь а, Оьрсийчуьра дечу хIакерийн тIелатарийн терахь лахлуш дац.
