Зорба тоха
Рамазан Алпаут
Регионашкарчу халкъашна харжамаш шайгга байта безий?
ГIалгIайчоьнан тайпанийн кхеташоно дIахьедина, регионийн куьйгалхой халкъо хоржуш хила беза, аьлла. И хаам бира оцу кхеташонан декъашхоша шаьш Маршо Радиога.
ГIалгIаша караэцна хьалхо кхарачоша долийнарг – церан Халкъан Конгрессо кху беттан 11-чу дийнахь кхайкхам баржийна Къилбаседа Кавказерчу юкъархойн цхьаьнакхетараллашка регионашкахь халкъо харжамаш беш бацарх шайна хетарг алар доьхуш.
Хаийта:
ГIалгIайчохь таханенна шиъ ю «тайпанийн кхеташо». Цхьаъ – мехкан ден гонехь, важа – ша-шеггара кхоллаелла юкъархойн цхьаьнакхетаралла. Харжамийн хьокъехь къамел айдинарг Iедалх йоцу шолгIаниг ю.
Евкуров Юнус-Бекан гIоьнчас-хьехамчас Перехрист Артема дIахьедина, Iедалан чоьнашка кхаьчна мехкан тайпанийн кхеташонан кхайкхам, аьлла. Амма цкъачунна официалехь жоц делла дац ГIалгIайчоьнан куьйгалло.
Ткъа мехкан лидеран пресс-гIоьнчанна ца хаьа, кхеташо хьенан лаамна тIетевжаш ю ша айдечу хаттарца. Жоп цо Маршо Радиона иштта делира:
«Тхуна ца хаьа, алссам наха дехарш динчул тIаьхьа, нахаца дагабевллачул тIаьхьа дина цара и дIахьедар, я ца дина».
Оцу юкъанна, ГIалгIайчоьнан тайпанийн Кхеташонан куьйгалхочо Ужахов Малсага даредарехь, цо а, цуьнан накъосташа а дIахаийтина Iедале шаьш цуьнга хIун хоьтту а, шайна хIун хета а.
«Стохка, шо доьрзуш, оха кхайкхам баржийра мехкан парламенте, кхидерг доцуш, кхузахь халкъе харжамаш байта беза аьлла а бара иза. I000 стаго куьг а яздинера кхайкхамна буха», - боху Ужаховс.
Цул совнах, тайпанийн кхеташонан лидеро бахарехь, цуьнан хьукмато йозанехь хаттам а бина вуьйцучу 1000 стагца.
Евкуровн пресс-гIоьнчас дагадаийтира, шайн махкахь стохка, парламентан харжамаш хиллале, къоман гуллам хIоьттира, цигахь дукхахберш бара мехкан куьйгалхо, халкъе а ца хоьттуш, парламенте харжарийтарехьа, аьлла.
«Тхуна мегаш ю парламенто мехкан куьйгалхо хоржу вариант, халкъ цунна дуьхьал а ца хилча. Кхин варианташ нахана езаш хилча, цара иза а къадийна хир дара шуьйрра», - элира ГIалгIайчоьнан администрацин векало.
«Халкъанна шенна лаьа харжа», амма харжамаш шега лаахь а, ца лааахь а юха а схьало аьлла, халкъ гIоттур дац, боху ГIалгIайчоьнан тайпанийн кхеташонан куьйгалхочо Ужахов Малсага.
