Полицин урхалло гIардаккхарца, кху деношкахь Веданан кIоштахь лаьцначу кхаъа стаганна юкъахь шиъ зуда ю. Цхьаъ МахкатIера ю, важа ю Соьлжа-гIалара. Хьалхарчуьнан 27 шо ду. Важа 33 шаре яьлла ю. Цаьршинна бехке диллинарг ду 2006-2008 шерашкахь кхача а латтош, гIаттамхойн аьтто бар.
ЦIарца буьйцуш боцучу зударийн хьокъехь кхин совдаьккхина дуьйцуш хIумма а дац. Масала, хIун бахьана долуш гIо деш хилла цаьршимма тIемалошна бохург хууш дац. Иштта хууш дац могIарера доглазархой хилла уьш, я цхьа гергарло долуш лелаш хилла и ши зуда тIемалошна гIо деш. Цаьрца цхьана лаьцна ву 31 шо долу Веданан кIоштан Элистанжара вахархо а.
Чоьхьарчу гIуллакхийн министро Алханов Руслана Iорадаккхарца, кху деношкахь Соьлжа-гIалахь сацийна леррина Москохара дуьйна, масех эзар чакхарма некъ а беш, гIаттамхошна тIекхача а, цаьрца уьйр таса а дагахь Нохчийчу кхаьчна хилла Дарья цIе йолу 20 шо долу оьрсийн къомах йолу йоI.
Министро чIагIдарехь, цуьнан Iалашо хилла тIеман говзалла кара а ерзийна, Москох,ша а леш, эккхийтар дан. Цунна хьехамаш бинарг, Iехийна-тилийна иза зуламечу новкъа яьккхинарг шайна мила ю хиъна бах Алхановс. Цо дийцарехь, галяьлла Нохчийчу кхаьчна йолу оьрсийн йоI Москохарчу низамхошка дIаелла.
Цхьаболчу бозуш боцучу тергамхоша билгалдаккхарца, меттигерчу Iедална хIетал-метал хиллачех цхьаъ ду, мел дакъа лоцу вайнехан зударша итт шарал сов бах а белла, махкахь сийсаш лаьттачу кху шолгIачу тIамехь бохург. Цаьрна хетарехь, нохчийн зударша тIемалойн агIончийн кхераме дукъ тIелацаран коьрта бахьана хила тарлуш ду гергарлонаш.
