Цо Нохчийчура яхархо Абубакарова Лариса Шема дехьа яьккхина хиларо а, базбинера цунна буьллу бехк. Диъ шо набахтехь яьккха хан тоьхна Присяжнюкана кхело.
Тамашийна дерг дац и кхел яр. Хууш ма хиллара, Нохчийчохь буьрса хьошу иштта дог-ойла йолу нах. Цецвоккхург ду, ша Присяжнюк Кирилл, дукха хан йоцуш скинхед-неонацист хилла хилар. Петарбхехь, шайн кхоьллина тоба а йолуш, кавказхой а, гастарбайтерш а бойуш зуламаш лелийна цо а, цуьнан накъосташа а. Схьа а лаьцна, дуккха а шераш а тоьхна чубоьхкира уьш цигахь а.
Набахтехь бусулба дин тIе а эцна, араваьлча, ДАIИШ-ца уьйраш тесна хилла 29 шо долчу Присяжнюка. Нохчийчурча кхело, цунна коьрта бехке дуьллург ду хIинца, меттигера яхархо Шема дехьаяьккхина хилар.
Къечу къоман нах ца безаш, уьш бойуш лелла керста а бусулба дине верзалуш хилча, нохчийн кегий нах а, шайн некъ царна марзбан хала хIума доцийла го, кIира сов хьалха Нохчийчохь хилларг тидаме эцча. 7 жима стаг вийра Iедалхоша хиллачу тасадаларехь.
Официалан версица а догIуш, уьш ДАIИШ-ан тобанца зIе йолуш хилла. Иштта бохамаш нохчийн къоман хьалхахь лаьттачу халонаша кхуллуш бу аьлла хета гуманитаран талламийн юккъараллан куьйгалхочунна Эльсункаев Надирсолтан.
Эльсункаев: «Кху деношкахь хилла и зулам боккха бала а, бохам а бу. Оцу тIехь соцур ду аьлла а ца хета суна иза. Вайн чура доьзал бу иза, шинна а агIора. Кху дуьненахь дIабоьлхуш геополитикан хиламаш бу. Хьалха хилла тIом а боцуш, иинформацин тIом а бу. Коьрта билгало ю, вай еш йолу пропаганда кхачо йолуш ца хилар. Ойла ян езаш ю цу тIехь».
Тахана Оьрсийчохь тIеэцна низамаш ду, бахархой терроран лоручу тобанех ца беттабалийта. Нохчийчохь-м ур-аттала царах цхьаъ тусавелча а, цуьнан гергара нах махках а бохуш, цIенош а дагош хIума до. ХIетте а, оццул луьра тIаьхьалонаш йоллушехь, муха аьтто хуьлу, масала, оцу ДАIИШ-ан, уьш шайна тIекIабан, аьлла деллачу хаттарна, иштта жоп делира политолого Эльсункаев Надирсолтас.
Эльсункаев: «Шалхе йолу хIума дац иза. ТIом чекхбаьлча, адамаш депрессин хьолехь хуьлу. Телевизионехула кхайкхамаш бича а, хьехамаш бича а тоьаш дац иза. Онда болх бан беза системан амалехь. Маса кино гайтина федералан телехьожийлашкахь нохчий а, гIезалой а, дагестанхой а, гIебартахой а дика гойтуш? Кегийрхошна гуш ма ду иза. -Вай-м царна хIумма а ма ца хета, - олу цара».
Кегийрхой цхьана хIуманах Iеха а белла, цара низамца догIуш доцург дича, берриге а бехк церан дайн-нанойн тIехь бац. Баккхийнаш тIамо дIабаьккхина шайн дуьненан аьтто лоьхуш лела. Шаьш яьккхинчуьнах Iедална ял а луш, цара латтош ю школаш а, полици а, кхийолу хьукматаш а. Церан а бу кегийрхошна кхетам ца баларна бехк, аьлла кхин дIа а дийцира гуманитаран талламийн юккъараллан куьйгалхочо Эльсункаев Надирсолтас.
Эльсункаев: «Къамел деш наха дукха хьолехь далхош дерг ду, зуламан новкъа ма довлахьара, вониг ма дахьара шайн бераш бохург. Болх-некъ бечу церан аьтто ма бац бераш 24 сохьтехь шайна уллехь латто. Школаш а, полици а болх бан безаш ю кхачам боллуш. Иза хьакхалуш ду Пачхьалкхан думах а».
Политолог Эльсункаев Надирсолта тешна ву дуьненахь хуьлучунна духе а кхиина, нехан кхетам лакхабалахь кегийрхой, ле а бина а, харц новкъа бахалур бац бохучух. Амма и кхетам генахь хиларна чолхалла кхин а ехха лаьттар ю аьлла хета цунна.
“Маршо Радион” доттагIий, шун аьтто бу тхан Facebook-ерчу аккаунтах пайда а оьцуш, тхан дискуссехь дакъалаца. Шун комменташна модераци ян эшарна, уьш сайтехь жимма тIаьхьо гучуевр ю. Нагахь санна тхоьга яийта шайн видео а, аудио а материалаш елахь, шун аьтто бу иза кху телефонца WhatsApp-e я Viber-e схьаяийта: 420 724 019832