ТIекхочийла долу линкаш

ЦIеххьана кхаьчна хаам!

Оспанов Къосам. Йилбазан марш


please wait

No media source currently available

0:00 0:00:48 0:00
Линкана тIе

Оспанов Къосам

Йилбазан марш

Хьо хIун сурт,
ХIун букъ-сурт?
Огуш, огуш
Ю цхьа юрт.

Хьо хIун цIий,
Хьо хьан хьий?
Догуш, догуш
Ду цхьа сий.

Хи, цIе уьйш,
ХIу дIадуьйш,
Iуьргаш девлла
Куьйгаш зуьйш –

Уьш бу уьш.
Уьш бу уьш
Нахах бевлла
Нах бу уьш.

БIаьрса дов
Я садов
Шело, гIело
Йохьуш дов.

БIаьста, Iай –
Iаьржа, кIайн
Лолла лело
ЛеIаш лай.

ЦIеран цIов
Болу сов.
Нехан бала –
Нехан дов.

Къан ца ло,
ЦIан ца ло.
Дохко вала
Хан ца ло.

Оспанов Къосам гоьваьлла нохчийн байтанча ву. 1960-чу шеран лахьан-беттан 7-чу дийнахь Хьалха-Мартанан кIоштарчу СаIди-КIотарахь дуьнен чу ваьлла ву Оспанов Къосам. Цуьнан 17 шо кхачале Хьалха-Мартан кIоштан газетехь зорбане йийлина поэтан дуьххьарлера байташ. 1977-чу шарахь ваьлла иза СаIди-КIотарара юккъера школа чекхъяьккхина. 1979-чу шарахь эскаре гIуллакх дан ваххалц оццу школехь хьехархочун болх бина. Эскарера цIавирзинчул тIаьхьа а масех шарахь шайн юьртарчу юккъерчу школехь хьехархочун болх бина. Ткъа 1983-чу шарахь кхолламо Урале кхачаво байтанча. Магнитогорскехь чекхйоккху цо хьехархойн институт а. 1991-чу шарахь Уралера цIавоьрзу Оспанов Къосум. ХIетахь дуьйна Нохчийчохь зорбане мел долучу газетехь а, журналехь а луьста гучаюьйлу шатайпачу башхаллица къеста цуьнан байташ. Цу муьрехь зорбане дуьйлуш хиллачу «Маьлх-Аьзни» журнале балха хIутту къона поэт. Кхоллараллин гергарло тасало цуьнан «СтелаIад», «Вайнах», «Орга» цIе йолчу журналашца. Оцу журналийн агIонаш тIехь кест-кеста зорбане юьйлу Къосуман чулацаме байташ. Уьш билгалъюьйлу авторна кIорггера ненан мотт хууш хиларца, цуьнан хьалхарчу хьаьркаца дешархо цецвоккхий, чекхъяллалц байт еша сакIамдеш, йийсарехь латторца.

Оха хьоьхург

XS
SM
MD
LG