ТIекхочийла долу линкаш

ЦIеххьана кхаьчна хаам!
please wait

No media source currently available

0:00 0:04:09 0:00
Линкана тIе

2011-чу шеран бIаьстенан юьххьехь Шемарчу ДараIа олучу цхьана жимчу гIалахь масех кхиазхоша шаьш доьшучу ишколан пеношна тIе графиттица урхаллин критика еш йозанаш яздинера.

Полисхоша тIаккха и бераш лаьцна шайн декъе дIа а дигина, царна къиза таIзарш динера. Иттанаш шерашкахь дуьхьало а ца еш Асадан режим а, Баас партин харцонаш а ловш Iийна меттигера бахархой дуьххьара урамашка бевлира тIаккха.

Iедалхоша и дуьхьалонан акци цIийла карчийра. ДараIахь митинге арабевлларш лийцира. Масех стаг вийра, чевнаш а йира дуккхаъчарна. Социалан машанашкахула хилларг даьржинчул тIаьхьа цу гIалин бахархошца солидаралла гайта йоллучу Шемахь а гIаланашка бевлира маьрша бахархой Зазадоккху-беттан 15-чохь.

Иштта дIаболабелира тахана шен 7 шо дуьзна Шемара тIом.

ХIетахь, Шемин тайп-тайпанчу гIаланашкахь дуьхьалонан акцешка адам арадийла доладелча, ткъа Асадан нуьцкъалийн структураш уьш къарбан гIерташ, царна дуьхьал таIзарш дечу муьрехь цхьанна а ца моьттура, цу гIаттамах вайнзаманхьлера уггаре а къизачех а, бехачех а, я чакхе а, я машаре некъ а ца го тIом хир бу аьлла.

Ца моьттура цхьанна а и тIом сел дера, сел шуьйра, сел шога нохчех хьакхалур бу аьлла. Цул хьалха а, цуьнца нийса а ОвхIанехь а, Иракъехь, Либехь а хилла тIемаш санна генара, телевизионехула гинчул бен кхин герга ца гIуртуш йолу конфликт а хилла, иза а буьсур бу аьлла хеталора.

Амма, мел тIаьхьа а, 2013-чу шарахь и тIом кIезга я дукха нохчийн тIом а хилар къаьстира, цкъа хьалха иттанашкахь, тIаккха бIеннашкахь а нохчийн къомах нах цу тIамо шена юккъеийзон буьйлабелча.

Нохчийчуьра а, Москохара а, Европерчу пачхьалкхашкара а дийна доьзалшца вайнах Шема дIаиха буьйлабелча.

Цкъа юхьанца Шемара тIом Асадна дуьхьал гIаттам а, мохк Баас партин режимах маьрша баккхарехь къийсам а болчу хенахь, я вуьшта аьлча, тIеман ши агIо – Асадан агIой, гIаттамхойн агIой - бен йоцучу хенахь цу тIаме бахначу нохчийн цхьа бахьана дара цига баха. Асадна дуьхьал къийсамехь дакъалацарца цуьнан коьртачу гIорторна Путинна а, Оьрсийчоьнна а дуьхьал къийсам бар.

Ткъа Шемара хьал чолхе мел доьрзу а, гIаттамхойн могIарш бекъа мел ло а, ткъа режимна дуьхьалчу гIаттамах глобале динан тIом мел хуьлу а бен-бен дирзира нохчий Шемарчу тIаме буьгу бахьанаш а.

2014-чу шеран аьхка Шемахь бусалба Халипат кхоьллина, массо а бусалба стаг цу Халипатан куьйгалхочунна БагIдади Абубакарана байIат дан декхарийлахь а ву, шен кадолушв ерг Шема хиджрат да дезаш а ву аьлла дIа а кхайкхинчул тIаьхьа дагахь а доцучу барашка дирзира Шема хьевддачу нохчийн терахь.

Еккъа цхьана Европерчу пачхьалкхашкара эзар сов стаг вахара дуьненчохь уггаре а баккхийчу Iеламнаха емал ечу ша шех "Исламан пачхьалкх" олучу ДАIИШ тобанан могIаршла верзархьама Шема. Царна юккъехь зударий а, бераш а, ур-атталла кхианза зудбераш а дара.

Тахана цу нехан цхьа дакъа я тIемашкахь дийна я бомбашна кIелахь делла. Цхьа дакъа ша шех "Бусалба Пачхьалкх" олуш хиллачу тобан къизаллаш ма-ярра гича, дедда кIелхьараделира, амма кIелхьарадаьллачул тIаьхьа шаьш юхабирзинчу пачхьалкхашкахь кхеле озийна.

Цхьаццаберш хIинца а ДАIИШах дисинчу цинцашлахь тIом беш ду. Ткъа бисинарш, доккхачу декъехь зударий, бераш, Иракъехь а, Шемахь а лийцина, набахтешкахь бохкуш бу.

Шина тIамехь оьрсийн эскарша ца бойъуш бисинарш, наноша тIамах бовдийна хийрачу мехкашкахь кхиош хилларш, дуьйцу а ца хезначу хийрачу лаьттарчу генарчу меттигашкахь даиманна бисар а, бIеннашкахь кегий бераш байлахь дисар а, къона зударий жоьра бисар а – Шемарчу тIамо нохчийн къомана юккъехь дитина жамI.

Амма иза хилла а ца Iа.

Радикалечу исламхойн идеологин цамгаро дийна цхьа чкъор лацар а ду нохчашна Шемарчу тIамо бинчу тIеIаткъаман цхьа дакъа. Рибат, тагIут, бакъия, царех терра цхьа могIа дешнаш а дахкийна Шемарчу тIамо нохчийн маттана юккъе.

Мотт ца тохарна таIзар дан оьшу аьлла хетий шуна?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG