Йишига.
Гацаев СаьIид
Хьуна-м гина сийна баьллаш
Вайн цIахь, уьйтIахь, лаьттина.
Хьоьга санна, цаьрга меллаш
Ас маршалла хиттина.
Хаза яра уьш, цхьа эсал,
Елаелла даггара.
Амма дада иза осал
Хетаделла хиллера.
Диг а эцна, дIа тIевахна,
Хьашт дац! – аьлла, – IиндагIаш,
Ткъес а доцуш, малхехь тоьхна,
ГIийла хьаьвзи боллан гIаш.
Со ца Iелуш, вилхи тIаккха:
Сийна баьллаш яцара.
Дадас церан, эцца хьаькхна,
Кертан хьокхий дийгIира.
Иштта, шу а дIадай кестта
Цу вайн хазчу кертара.
Гiийла, гIийла со цхьаъ леста,
И талл санна, кетIара.