“Спутник V” вакцина зуьйш, кхоалгIачу, уггаре мехалчу муьрах хьалхара гIулч яьккхина коронавирусна дуьхьало кхуллуш хьийзачу Оьрсийчуьрчу дарбан авторша. Клиникан талламаша гайтарца, 92% эвсаралла ю цуьнан, чIагIдо цара. Иштта ду РБК агенталлехула вакцина юкъайоккхуш бохкучу Гамалеян Центрерчу говзанчаша дина дIахьедар.
Ткъа оршотан дийнахь Америкерчу Pfizer а, Германерчу BioNTech компанеша а даржийра шаьш девлла кхаа а муьрехь зераш дина, шайн вакцино 90% эвсаралла гайтина, аьлла.
Оьрсийчоьнан вакцина шайна тохийтинчу зерийн дакъашхойх 20 стаг цомгуш хилла коронавирусах, боху дарба кхоьллинчара – уьнна дуьхьало (плацебо) кхоллаяла езаш яра талламаш дIахьочу говзанчаша вакцина тоьхначу нахах дукхахболучаьргахь.
16 эзар стаг-лаамхо хилла вакцина толлуш декъаозийна. Ткъа юхьанца 40 эзарна тIехь зуьйр ду юкъадоккху дарба, бохура. Кхеташ дац стенна нисъелла и башхалла. Вакцина шина компонентах лаьтта, амма цуьнан эвсаралла гIараяьккхина талламна юкъаозийначу наханна тIехь хьалхара доза бен тоьхна а йоццушехь.
"Спутник V" вакцина кхоьллина Гамалеян цIарах йолчу эпидемиологин а, микробиологин а центрехь. Вакцина патентаца тIечIагIйиаа юьззина телла а йоцуш. Медикашна а, Iедалан цхьацца белхахошна а тухуш ю иза цкъачунна. Америкахоша а, немцоша а шаьш кхоьллинчу вакцинин эвсаралла 90% ю оллушехь дина ду Оьрсийчоьно шен вакцина 92% эвсаре ю, аьлла.
Амма Американ-Германи вакцина а яц юьззина теллина. Яцахь а, Pfizer лерина ю шайн FDA дарба къобалдайта дехар чудала кечлуш. Кхачамбацар могIараниг а дац FDA вакцинин – иза дIасадахьа йиш яц 70 градус шелонехь бен, ткъа оцо халачу хьоле доккху медицина лахарчу тIегIанехь йолчу пачхьалкхашка дарба дIасакхачор.
