ТIекхочийла долу линкаш

ЦIеххьана кхаьчна хаам!

Интернетехь харцонна дуьхьал довларе кхайкхина бахархошка Нохчийчоьнан зорбан министро


Зорбанан министр Дудаев Анзор
Зорбанан министр Дудаев Анзор

Интернетехь баржон аьшпаш бенцахетарца ма бита аьлла, кхайкхам бина Нохчийчоьнан къоман политикан а, арахьарчу зIенийн а, зорбанан а министро Дудаев Ахьмада меттигерчу бахархошка.

"Бакъоларъяран организацеш ю шаьш бохучара а, провокаци лелочу хаамийн гIирсаша а Нохчийчоьнна тIеIаткъам беш хилар тахана билгалдоккху вай. Цара ден тIелетарш го вайна денна, церан коьрта Iалашо ю - Нохчийчохь хуьлучу массо а дикачу хийцамашна тIе шеконаш тийсар", - билгалдаьккхина министро.

Чохь интернет йолучарна а, социалан машанашка язбеллачарна а тIедожийна Дудаевс, питане дизинформацина дуьхьало латтае аьлла.

"ХIора Нохчийчоьнан вахархочун шен позици хила еза, шена хетарг дIа а олуш. Нагахь санна, цхьаъ бух боцуш критика еш, эладитанаш даржош велахь, бакъволу патриот бен доцуш Iен ца веза", - аьлла министро Дудаев Ахьмада.

Оцу юкъанна, шена хетарг, шен бакъ йолу позици социалан машанашкахь дIахаийтинарш нохчийн пачхьалкхан "Грозный" телехьожийлан эфирашкахь юьхьIаьржа хIиттийна, лецна, байъина, тIелетарш дина, махках баьхна дуккха а меттигаш бу. Абдурахманов Тумсо, Венера Анзор, Тепсуркаев Салман, ишта кхин дIа а.

Карладоккху, стохка Товбеца-баттахь Нохчийчоьнан куьйгалхочо Кадыров Рамзана тIедиллира "экстремизман а, малхбузен мехаллийн а идеологашца" къийсам эвсарабаккха безар бу аьлла. Оцу балхана тIехь терго латтор зорбан министрна Дудаев Ахьмадна кхачийра.

Ткъа 2019-чу шеран гурахь "Грозный" телеканалан эфирехь Кадыровс емалбира, цунна хетарехь, интернетехь "сий дойъурш". "Адамашна юкъара барт эгIош, эладитанаш дуьйцуш, нахана юкъа цимаш туьйсурш. Нагахь санна, и нах вай совца ца бой, байъина а, чубоьхкина а, кхерийна а, вайчух гIуллакх хир дац", - аьлла, дIакхайкхийра Кадыровс.

Оцу тIехула "Мемориало" а, Москварчу Хельсинкан тобано а дехар динера Талламан комитетан куьйгалхочуьнга Бастрыкин Александре, Кадыровс динчу къамелан чулацам талла аьлла.

Оха хьоьхург

XS
SM
MD
LG