Талламан комитетан Къилбаседа Кавказерчу коьртачу урхалле арз хьажийна, Нохчийчохь 2017-чу шеран Дечкен-беттан 26-чу буса 27 стаг лачкъор а, вер а толлуш, бехктакхаман гIуллакх цагIатторна дуьхьал.
Шен орзехь адвоката Немов Александра тидам тIебохуьйту оцу ирчачу хиламца дозу керла хьал гучудаларна. Иза ду "Новая газетехула" Кадыров Ахьмадан цIарахчу полкехь полицин гIаролан №2 ханехь болх бинчу Гезмахмаев Сулимана дина тоьшалла. Цо ша еллачу интервьюхь дийцина лецначу нахана тIехь гIелонаш ярх лаьцна.
Бехкталламан гIуллакх айдар зуьйш дIабаьхьина болх кIезиг а, озабезам беш а, низам талхош а бина, билгалдоккху Немовс.
Бехктакхаман гIуллакх цаайдарх болу сацам тIеэцна 2018-чу шеран Чиллан-баттахь. Бакъоларъяран цхьаьнакхетараллаш дуккхаза а гIиртина цул тIаьхьа и сацам кхелашка юхабаккхийта, амма аьтто ца баьлла.
Адвоката Немов Александра болх бо бакъоларъяран "Мемориал" центрца (Оьрсийчоьнан Iедало арахьарчу агентийн статусе яьккхина "Мемориал", амма "Мемориало" тIе ца иза - ред.).
- "Новая газетан" хаамашца, 2016-2017-чу а шерашкахь Нохчийчохь лецна хилла иттаннашкахь меттигера бахархой байъина Кадыров Ахьмадан цIарахчу полкан ларми чохь. Тоьшалаш далийна журналисташа, полкехь полисхо лаьттинчу, лецначийн ха деш хиллачу Гезмахмаев Сулиманца йина интервью.
- Газето информаци Iораяьккхинчул тIаьхьа царна дуьхьал информацин кампани йолийра Нохчийчоьнан Iедалхоша.
Беттан 18-чохь мехкан коьртачу шахьарахь дIахIиттийра Кадыров Ахьмадан полкан полисхой. Царех цхьаммо Оьрсийчоьнан президенте Путин Владимире дIахьедира, шаьш журналисташна таIзар дийр ду аьлла. - Нагахь санна, газето дуьйцург харц делахь, кхеле довла аьалла, хьехар дира Кремло, шайга бинчу латкъамна дуьхьал.
- Европан Кхеташонан адамийн бакъонашкахула йолчу комиссара Миятович Дуняс Оьрсийчоь декхарейина "сихонца, озабезам боцуш, йозуш йоцчу кепехь талла" Нохчийчохь, кхел а йоцуш, нах хIаллакбарх лаьцна "Новая газето" яржийна информаци. Журналисташа бина хаам "дегIе зуздоуьйтуш " бу, аьлла Миятовича.
