ТIекхочийла долу линкаш

ЦIеххьана кхаьчна хаам!

Сокуров "йохкаелла муцIар" ю аьллачу Кадыровс, цуьнан дешнашца экстремизм лаха аьлла, хьехна


Кадыров Рамзан

Адамийн бакъонашкахула йолчу Кхеташонан декъашхойн Оьрсийчоьнан президентца Путин Владимирца хиллачу цхьаьнакхетарехь кинорежиссеро Сокуров Александра динчу дIахьедарна комментарий йитина Нохчийчоьнан куьйгалхочо Кадыров Рамзана. Шен телеграм-каналехь Кадыровс "нигилист" а, "йохкаелла муцIар" а аьлла Сокуровна, ткъа цуьнан вистхилар - "маразматикан" а, "Американ гIучIан кехат" лерина.

Къаьсттина оьгIазвахийтина Кадыров, Сокуровс шен къамелехь Нохчийчоьнца дозанаш хийцар бахьана долуш, ГIалгIайчохь лилхина протесташ а, гIалгIайн протестан ворхI лидерна дуьхьал бехктакхаман гIуллакх айдар а хьахоро.

Кадыровс дIахьедина, дозанаш хийцар федералан омра а, гIалгIайн Iедалхойн инициатива а яра, Нохчийчоь ю ГIалгIайчоьнна шайн латтанийн уггар а "дезачух дакъа" духаделларг аьлла. Юьйцург ю ГIалгIайчохь йисина бархI эвла, оцу тIехула "тхайн къаной дIатебан дийзира сан" аьлла Кадыровс.

Цул совнах, Оьрсийчоьнан декъахь йолчу мехкашкахь долчу эскарех а, "паччахьех" а аьлла дешнаш а, шена тIеозийна Кадыровс, режиссеро шен къамелехь Нохчийчоь а, йа иза ша а хьахийна воцушшехь.

"Кхоьруш ца яьккхина Сокуровс сан цIе, амма массо а кхетта, вуьйцург со вуйла", - тидам бина Кадыровс.

Цунна жоп лучу Кадыровс хьехна Сокуровна, "хьала а гIаттий, хьажа, мила вара субъектийн куьйгалхойх президент бахар дехка аьлла, вистхилларг"

"Со - Кадыров Рамзан ву. Со президент вац, паччахь а вац. Со - Нохчийчоьнан куьйгалхо ву...",- яздо нохчийн урхалхочо.

Шен эскарх лаьцна бехкбаккхарна жоп лучу Кадыровс аьлла: "дух-духа баха а кIордор дац суна, со Лаккхарчу эскаран коьртерчу хьаькаман пехотинец ву, тхан массо а тIемалой федералан урхаллана муьтIахь бу".

Иштта Нохчийчоьнан куьйгалхочо бехкбиллина Сокуровна, "300 эзар нохчий бойъуш, масех иттаннашкхаь доьза байча, стешха режиссеран кресли чохь Iийна" иза аьлла.

Оцу шен дIахьедаршна тIетоьхна Кадыровс: "Компетенте органийн метта со хилча, ас мах хадор бара Сокуровн дешнийн, пачхьалкхана дуьхьал, экстремистийн битам болуш дуй хьожуш. Ца еза суна и йохкаелла муцIар!".

Адамийн бакъонашкахула йолчу Кхеташонан декъашхошца хиллачу онлайн-цхьанакхетарехь еарин дийнахь Оьрсийчоьнан президентан а, кинорежиссеран Сокуров Александран а шога къамел хилира, Оьрсийчохь Iитталучу дуккхаъчу проблемех лаьцна цо дIа а хьедеш. Уггар а йоккха проблема лерира цо Къилбаседа Кавказехь долу хьал, доккхачу декъанна, Нохчийчоьнна мехкан дозанан дакъош дIаделлачул тIаьхьа йолийна ГIалгIайчуьра протесташ хьахош, оцу тIехула лаьцна латточу протестан лидерийн цIераш а йохуш, уьш маьршабахар тIе а дожош.

Хаалучу резавацарца жоп делира Путина цуьнан къамелана.
"Бехк цабиллар деха хIума ду, хIунда аьлча, вистхилар дацара хьайниг, манифест яра, гулбелла кхерамаш", - аьлла цо.

Путина бахарехь, Конституцехь хийцамаш беш дIабаьхьначу харжамаша тоьшалла до, Оьрсийчохь сепаратизм оьшуш цхьа а цахилар, иштта, нохчийн къам а цхьаьна.

Нохчийчуьра ницкъаллин структураш, формалехь бакъоларъяран урхаллашна юкъайогIуш елахь а, Кадыровна муьтIахь ю. Масех де хьалха Соьлжа-ГIалахь рогIера Iаморша дIадаьхьира, эзар сов ницкъхочо дакъа а лоцуш.

Лахьан-бутт бовш Кадыровс кхерам тесира, ГIалгIайчоьнера бархI эвла юхаерзор ю ша, нагахь санна, гIалгIайн жигархоша латтанаш хийцарх лаьцна претензеш совца ца яхь аьлла.

Нохчийчохь паччахь олу Кадыровх. Масала, стохка Стигалкъекъа-баттахь Кадыровна коронавирусан ун даьлла бохуш, дийца даьккхинчу юкъахь, парламетан спикеро Даудов Мохьмада дIахьедира "вайн паччахь могуш ву" аьлла.

Кху шеран Товбеца-баттахь аукционе даьккхинера, "Паччахь" цIе йолу Кадыровн виртуалан портрет. Шайн белхан мах хIоттийнера авторша 75 миллион сом.

Коьрта теманаш

Оха хьоьхург

XS
SM
MD
LG