Кхайкхийна мацалла юхаяккхар доьхуш, кхайкхам бина ГIалгIайчоьнан муфтийс Хамхоев Iийсас, "гIалгIайн гIуллакхна" тIехула лецначу жигархошка.
Цо бахарехь, дино могуьйтуш дац мацалла хьегар, хIунда аьлча, цо организмна эшам бо.
Муфтийна тIетайна иштта муфтиятан кхинболу векалш а цхьана: яртийн имамаш а, къеда волу Цороев ИсмаьIал а.
"Оцу Iедална дуьхьало еш мацалла хьоьгуш ду шу, амма цо шун гIора эшор ду, и ду Iедалхошна луург - ГIалгIайчоьнан бахархой гIелбар", - аьлла, дIахьедина Альтиево олучу эвлан имама Мальсагов Iусмана.
2019-чу шарахь ГIалгIайчохь хIиттийначу дуьхьалонан митингашкахь дакъалацарна лаьцначу жигархоша мацалла кхайкхийра Зазадоккху-беттан 10-чу дийнахь "гIалгIайн протестан" лидерех лору Саутиева Зарифа юха а изоляторе юхаялийча.
Ессентуки гIалахь дов хоттучу Кисловодскан кхело изоляторера цIахь латточу хьоле яьккхира Саутиева. Амма прокуратуро и сацам латкъаме а баьккхина, хийцийтира Ставропол-мехкан Лакхарчу кхеле, ткъа 16-чохь Саутиева изоляторе дIайигира юха а.
2019-чу шеран аьхка лецна гIалгIайн протестийн лидерш бехкебо экстремизман тобанехь хиларна а, 2019 шеран Зазадоккху-баттахь Магасехь гулам бохош хьийзинчу Iедалан белхахошна дуьхьал ницкъ баккхарна а.
"ГIалгIайн протестан" гIуллакх айдеш лецира 48 стаг, 30 сов стаганна кхайкхийна набахти.
2021-чу шеран Чиллан-беттан 26-чохь оццу девнаца доьзна лаьцна ГIалгIайчоьнан чоьхьарчу гIуллакхийн министр лаьттина Погоров Ахьмад а.
Саутиева а, цуьнца лецна латтош болу кхиберш а политикан тутмакхаш лору бакъоларъяран "Мемориал" центро (Оьрсийчоьнан Iедало "Мемориал" яьккхина арахьарчу агентийн статусе, амма "Мемориал" къера ца хилла цунна – ред. билгалдаккхар)
