Нохчийчоьнан куьйгалхочунна кIоршаме критика йарца гIараваьлла волу блогер Магомадов Сайд-Хьусейн хаавелла зазадоккху-беттан 23-хь Соьлжа гIалахь хиллачу "къоман гуламехь". Iедалхоша дIахьочу гуламан делегатех цхьаъ ву Магомадов. Йоккхачу залчохь Iаш гуш ву иза, цуьнан суьрташ гайтарца дуьйцу Iедална оппозицехь йолчу Niyso телеграм-канало. Социал-машанашкахь республикан лакхарчу хьаькамашца гуламехь цо даьхна суьрташ а ду.
Даймахкал арахьа беха Кадыровн критикаш кху тIаьхьарчу 15 шарахь кадыровхоша лохуш а, бойуш а лаьтта. Ткъа церан гергарнаш республикерчу Iедалхоша сих-сиха репрессеш йеш, хьийзабо. Бехха цхьа могIа бина, дIахIитна Европерчу пачхьалкхашкахь Кадыровн полит - оппоненташ байаран масаллаш.
2021-чу шарахь Магомадов Сайд-Хьусейнна тIелата бина кечам шаьш сацор дIахьедира Австрерчу прокуратуро. Дийцарехь, иза Iачу Брегенц гIалахь и эккхийта лерина хиллера зуламхой. "Цара санна (гергарчарна) кхерамаш туьйссу, сан диъ шо долчу вешин йоIана логах урс хьокхур ду шаьш бохуш, элира Der Standard - гIирсе цу хенахь Магомадовс.
2020-чу шеран гIадужу баттахь дохковолуш къамел ша дийр дац блогеро аьллачул тIаьхьа, Нохчийчуьрчу гергарчара Магомадовна наьIалт кхайкхош видео-къамел дира. Гуш дара, царех хIорамма республикан Iедалхошна йо критика сацайе бохуш.
Магомадов Сайд-Хьусейнан Нохчийчуьра Iедалца долу гергарло маца таделла, хууш дац. ХIинца социал-машанийн агIонашкахь маьршачу Ичкерин агIора болучеран критика йеш ву иза.
- Туркойн-махкахь Нохчийчуьрчу Iедалан оппоненташ байаран масаллаш масех ду. Волайнхойн могIарехь бу - Эдильсултанов Гаджи, Джанибеков Ислам, 2008-чу шарахь вийна и шиъ, Асаев Iела (Муса) – 2009-чу шарахь, Мусаев Берг-Хьаж, Альтемиров Рустам, Амриев Заурбек – 2011-хь, Унлю Медет – 2013-чу шеран стигалкъекъа-баттахь, Эдильгериев Iабдулвахьид – 2015-чу шеран лахьан-баттахь, Исрапилов Руслан – 20I6-чу шеран стигалкъекъа-баттахь.
- 2019-чу шеран марсхьокху-баттахь Берлинехь вийра Масхадов Асланан, Басаев Шамилан накъост, нохчо Хангошвили Зелимхан. 2017-чу шеран гезгамашан-баттахь Киевехь герз диттина йийра нохчо Амина Окуева: цул тIаьхьа масех де даьлча, Киевехь эккхийтира Гуьржийчоьнан махкахо, нохчо Тимур Махаури.
- 2009-чу шеран дечкен-баттахь Венехь герз диттина, вийра Кадыровн хилла ларвархо Исраилов Iумар. 2004-чу шеран чиллин-баттахь Катарехь эккхийтира Ичкерин президентан декхарш кхочушдеш волу Яндарбиев Зелимхан.
- Нохчийчохь адамийн бакъонаш эшор, хIоттамашца жоьпе ийзор дуьнен-йукъарчу цхьаьнакхетараллийн хаамашкахь дуьйцуш ду. Масала, у Amnesty International-гIирсо. Иштта - Европан бертан, Европан кхеташонан парламентан ассамблеехь, США -н Пачхьалкхан департаментехь.
